ქართული ოცნების და ხალხის ძალის წარმომადგენლები MMA-ის მებრძოლის, გიორგი ქართველიშვილის მიერ ახალი მოძრაობის დაფუძნებას ეხმაურებიან, რომლის მიზანიც "ქართული ღირებულებების, ფასეულობებისა და ტრადიციების" დაცვა იქნება.

ვიცესპიკერი ნინო წილოსანის თქმით, "ამ მოძრაობას საჯაროდ აქვს დაანონსებული, რომ მყისიერი რეაგირება ექნებათ", ამიტომ საზოგადოებას აფრთხილებს, რომ "ყველამ გააკონტროლოს თავი, რომ ადამიანის ღირსებას არ შეეხონ".

"არ შეიძლება ჩვენს რწმენაზე, ოჯახებზე, ღირებულებებზე ვიღაც ადამიანებს გარკვეული შეურაცხყოფები "გავუტაროთ".

ჩვენი რწმენა, ოჯახები, გამორჩეული ეროვნული გმირები და საზოგადოებრივი მოღვაწეები არის ჩვენი ღირსება. როდესაც ადამიანის ღირსებას ეხები, უნდა იყო მზად, რომ ადამიანები საკუთარ ღირსებას დაიცავენ.

მე ძალიან არ მინდა, რომ ეს ფიზიკურ დაცვაში გადავიდეს, მაგრამ როდესაც შენ ამას მიზანმიმართულად აკეთებ, სამწუხაროდ, როგორც ჩანს, ესეც არ გამოირიცხება ხოლმე. ყველას მოვუწოდებ, ფიზიკური ანგარიშსწორება არ არის ფორმა, რომელიც მისაღებია, თუმცა ამავდროულად არც ერთი ასეთი მავნებლური და შეურაცხმყოფელი გამონათქვამი არ უნდა იყოს უპასუხოდ დარჩენილი.

ამ მოძრაობას საჯაროდ აქვს დაანონსებული, რომ მყისიერი რეაგირება ექნებათ, ამიტომ ყველამ გააკონტროლოს თავი, რომ ადამიანის ღირსებას არ შეეხონ. არის ის ნორმა და მორალური სტანდარტი, რომელსაც ქართული საზოგადოება საუკუნეებია შევთანხმდით...“ — განაცხადა ნინო წილოსანმა.

პარლამენტის იურიდიულ საკითხთა კომიტეტის თავმჯდომარე არჩილ გორდულაძის აზრით, ყველას აქვს უფლება "გაერთიანდეს, საკუთარი აზრი დააფიქსიროს, ამავდროულად, ეს უნდა იყოს კანონის ჩარჩოებში სრულად მოქცეული".

"ყველას აქვს უფლება, რომ გაერთიანდეს, საკუთარი აზრი დააფიქსიროს, ამავდროულად, ეს უნდა იყოს კანონის ჩარჩოებში სრულად მოქცეული. რა თქმა უნდა, მნიშვნელოვანია და კარგია, როდესაც ადამიანებს აქვთ სურვილი, დაიცვან, ხმა აიმაღლონ ქვეყნის კულტურის, რწმენის, ადამიანების უფლებების, ისტორიის წინააღმდეგ მიმართულ მიზანმიმართულ ქმედებებზე. რა თქმა უნდა, ეს ყველაფერი უნდა მოხდეს კანონის დაცვით და სრულ ჩარჩოებში", — განაცხადა გორდულაძემ.

ქართული ოცნების სატელიტი პარტია ხალხის ძალის ერთ-ერთი ლიდერის, გურამ მაჭარაშვილის აზრით, "კანონმდებლობის ფარგლებში თუკი ვინმე შეეცდება, რომ საკუთარი ქართული იდენტობა იყოს დაცული, ეს მხოლოდ მისასალმებელია".

"კანონმდებლობის ფარგლებში თუკი ვინმე შეეცდება ან ადამიანთა ჯგუფი, რომ საკუთარი ქართული იდენტობა იყოს დაცული, ეს მხოლოდ მისასალმებელია.

თუ ფიზიკური დაპირისპირება მოხდა და ა.შ, არსებობს რეაგირება. მაგრამ ის, რომ დღეს, ზოგადად, არის ქართული იდენტობა დასაცავი, ეს არის ფაქტი და მოცემულობა.

ხაზს ვუსვამ, კანონმდებლობის ფარგლებში და მე დარწმუნებული ვარ, იმ ხალხმა თუ იმდენი მოიფიქრა და შეძლო, რომ კანონმდებლობის საფუძველზე აყალიბებს ორგანიზაციას, იმდენსაც მოახერხებს, რომ ასევე კანონმდებლობის ფარგლებში დაიცვას ქართული იდენტობა, " — ამბობს გურამ მაჭარაშვილი.

MMA-ის მებრძოლმა, გიორგი ქართველიშვილმა დღეს გამართულ ბრიფინგზე განაცხადა, რომ მოძრაობა შეეცდება "ქართული ღირებულებები" ნორმისა და კანონის ფარგლებში დაიცვას, თუმცა, საჭიროების შემთხვევაში, მზად არიან "ციხეშიც წავიდნენ".

ქართველიშვილი საზოგადოების ყურადღების ცენტრში ბოლო პერიოდში ონისე ოქრიაშვილზე თავდასხმასთან დაკავშირებით მოექცა. მედიის მიერ გავრცელებულ კადრებში ჩანს, როგორ ტოვებს თბილისის საქალაქო სასამართლოს ონისე ოქრიაშვილის თავდამსხმელი ნიკო ხურცილავა საქალაქო სასამართლოს ეზოს გიორგი ქართველიშვილთან ერთად.