ჯარედ ლეტო სექსუალური ხასიათის დანაშაულებრივ ქმედებებთან დაკავშირებულ ბრალდებებს კატეგორიულად უარყოფს. აღნიშნული ბრალდებები BBC-ის დოკუმენტურ ფილმში ოთხმა ქალმა გააჟღერა. მათი მტკიცებით, ლეტომ დანაშაულები მაშინ ჩაიდინა, როდესაც ისინი თინეიჯერები იყვნენ.

BBC-ის ცნობით, მომღერალთან დაკავშირების მრავალგზის მცდელობის მიუხედავად, ლეტოს წაყენებულ ბრალდებებზე პასუხი არ გაუცია. თუმცა, დოკუმენტური ფილმის გამოსვლიდან რამდენიმე საათში, მსახიობის წარმომადგენელმა მისი სახელით განცხადება გაავრცელა. "ცხოვრებაში სექსუალურად არავისზე მიძალადია. ეს ბრალდებები ყოველგვარ საფუძველსაა მოკლებული და სრული სიცრუეა", — აღნიშნულია განცხადებაში.

BBC-ის დოკუმენტური ფილმში, სახელად ჯარედ ლეტო: ჰოლივუდის ბნელი საიდუმლო, 10-მა ქალმა ისაუბრა. მათგან ცხრამ საკუთარი ისტორია საჯაროდ პირველად გააჟღერა. ქალები აღნიშნავენ, რომ ლეტოს 2002 წლიდან 2016 წლამდე პერიოდში შეხვდნენ. ამ პერიოდში მსახიობი 30-დან 40 წლამდე ასაკის იყო, ახლა კი ის 54 წლისაა.

ერთ-ერთი ქალის განცხადებით, 17 წლის ასაკში იგი მოტელის სააბაზანოში სექსუალური ძალადობის მსხვერპლი გახდა. მეორეს თქმით კი, ჯარედ ლეტო მას სექსუალური ძალადობით მაშინ დაემუქრა, როდესაც 19 წლის იყო და სასტუმროს ნომერში მსახიობთან სრულიად მოულოდნელად მარტო აღმოჩნდა.

მესამე ქალი იხსენებს კალიფორნიაში ვარსკვლავთან დამყარებულ სქესობრივ კავშირს 17 წლის ასაკში, რაც იურიდიულად არასრულწლოვანის გაუპატიურებად კვალიფიცირდება. ქალის განცხადებით, როდესაც მან ახსენა, რომ აღნიშნულ შტატში სქესობრივი კავშირისთვის თანხმობის კანონიერი ასაკი 18 წელია, ლეტომ ეს ფაქტი სრულიად უგულებელყო.

მეოთხე ქალის მტკიცებით, ლეტოს მხრიდან ფსიქოლოგიური ზეწოლის მსხვერპლი იყო. მისი თქმით, მსახიობი ბოროტად იყენებდა საკუთარ ვარსკვლავურ სტატუსს და 16 წლის გოგოსთან სისტემატურად ახორციელებდა სექსუალური შინაარსის სატელეფონო ზარებს და სქესობრივ კავშირსაც სთავაზობდა.

ფოტო: 20th Century Studios

ჯარედ ლეტო 1990-იანი წლებიდან კინოინდუსტრიის ერთ-ერთი თვალსაჩინო წარმომადგენელია. მის ადრეულ, გამორჩეულ როლებს შორისაა ფილმები: Fight Club, The Thin Red Line და Girl, Interrupted. ფილმისთვის Dallas Buyers Club მსახიობმა ოსკარი მოიპოვა. რაც შეეხება ლეტოს მუსიკალურ კარიერას, როკჯგუფი Thirty Seconds to Mars 1998 წელს ჩამოყალიბდა და პოპულარობა მოიპოვა ისეთი ჰიტებით, როგორებიცაა: The Kill, Kings and Queens და This Is War. ამჟამად ჯგუფი ევროპულ ტურნეს მართავს, მომავალ წელს კი კონცერტებით ლონდონსა და მანჩესტერში მსმენელის წინაშე წარდგება.