BTS-მა 2027 წლის გრემის დაჯილდოებაში მონაწილეობაზე უარი განაცხადა. 2027 წლის თებერვალში დაგეგმილ გრემის 69-ე ყოველწლიურ დაჯილდოებაზე ჯგუფი თავის მუსიკას აღარ წარადგენს. მიზეზად ჯგუფი აკადემიის მიერ საუკეთესო აზიური პოპშესრულების კატეგორიის შემოღებით გამოწვეულ უკმაყოფილებას ასახელებს.

აღსანიშნავია, რომ ეს პირველი შემთხვევაა, როდესაც K-pop-ის ერთ-ერთმა ყველაზე გავლენიანმა სამხრეთკორეულმა ჯგუფმა დაჯილდოების ცერემონიაში მონაწილეობაზე უარი თქვა. აღნიშნული გადაწყვეტილების შესახებ ჯგუფის თითოეულმა წევრმა ინსტაგრამზე პოსტი გააზიარა.

"გადავწყვიტეთ, წელს გრემის დაჯილდოებაში მონაწილეობა არ მივიღოთ. იმედი გვაქვს, მუსიკას მოუსმენენ და შეიყვარებენ იმისთვის, რაც ის სინამდვილეშია, ნაცვლად იმისა, რომ რეგიონული ან ენობრივი ნიშნით დაყონ", — ვკითხულობთ ჯგუფის განცხადებაში.

ფოტო: Getty

სამხრეთ კორეის, იაპონიის, ჩინეთისა და აზიის რეგიონის სხვა ქვეყნების მუსიკისთვის გრემიზე ახალი კატეგორიის დამატება 16 ივნისს დაანონსდა. "კატეგორიის დამატება განპირობებული იყო იმით, რომ ჩვენმა მუსიკალურმა საზოგადოებამ გაგვიზიარა სურვილი, განსხვავებული და ახალი მუსიკალური ჟანრების დაფასების მეტი შესაძლებლობა ჰქონოდათ", — განაცხადა აკადემიის პრეზიდენტმა, ჰარვი მეისონმა.

შეფასებების მიხედვით, გრემის მხრიდან ეს არცთუ ისე წარმატებული ფორმულირება იყო, რადგან აზიური პოპი "ახლისგან" ნამდვილად შორსაა. ათწლეულებია, რაც აზიურ პოპმუსიკას უამრავი მსმენელი ჰყავს, მათ შორის აშშ-შიც. შესაბამისად, აზიურ პოპინდუსტრიაში გაჩნდა შიში, რომ ამ კატეგორიამ შესაძლოა აზიელი პოპარტისტების ერთგვარი იზოლაცია გამოიწვიოს და მათ მთავარ პრესტიჟულ კატეგორიებში კონკურენციის გაწევის შესაძლებლობა წაართვას.

20 მარტს BTS-მა ახალი ალბომი ARIRANG გამოუშვა. ალბომი პოპულარული გამოსვლისთანავე გახდა და ზედიზედ ორი კვირის განმავლობაში Billboard 200-ის ჩარტის სათავეში მოექცა, რაც K-pop შემსრულებლებისთვის სრულიად ახალი რეკორდია.