საქართველოს მე-5 პრეზიდენტი სალომე ზურაბიშვილი MMA-ის მებრძოლის, გიორგი ქართველიშვილის მიერ ახალი მოძრაობის დაფუძნებას გამოეხმაურა, რომლის მიზანიც "ქართული ღირებულებების, ფასეულობებისა და ტრადიციების" დაცვა იქნება.

სალომე ზურაბიშვილის თქმით, "ეს არის პოლიტიკა, რომელიც ერთი-ერთში ჯდება ძველ რუსულ სტრატეგიაში — როგორ მოვახდინო ქვეყანაში დესტაბილიზაცია და დასუსტება. არავითარ შემთხვევაში ამან არ უნდა გამოიწვიოს საპირისპირო, საპასუხო რეაქცია".

"ეს არის პოლიტიკა, ეს არის სტრატეგია ქვეყნის დესტაბილიზაციის, რომელიც ერთი-ერთზე ჯდება ჩვეულებრივ, ძველ რუსულ სტრატეგიაში, როგორ მოვახდინო ქვეყანაში დესტაბილიზაცია, ამ ქვეყნის დასუსტება, ამ საზოგადოების გახლეჩა... ძალიან ძველი ინსტრუმენტებია გამოყენებული. ამიტომ, ამ მხრივ სერიოზულად უნდა მივიღოთ.

მეორეს მხრივ — არასერიოზულად, იმიტომ, რომ ეს ადამიანები არ არიან სერიოზული ადამიანები და არავითარ შემთხვევაში ამან არ უნდა გამოიწვიოს საპირისპირო რეაქცია, ანუ ჩვენც მოვნახოთ სადღაც კუნთიანი ადამიანები და დავიწყოთ იგივე რაღაცა ჯგუფის შექმნა და დაპირისპირება, იმიტომ, რომ ერთ-ერთი საბოლოო მიზანი ასეთი ჯგუფების არის სწორედ ის, რომ საზოგადოებაში გაჩნდეს ორივე მხარეს ასეთი ჯგუფები და შემდეგ ეს გადაიზარდოს იმაში, რაშიც არ გადაიზრდება, იმიტომ, რომ ჩვენ უკვე გვაქვს ეს გამოცდილება, ვიცით რუსეთი აქ რას და როგორ მოქმედებს და ამიტომ არ უნდა მივცეთ ამისი უფლება", — განაცხადა საქართველოს მე-5 პრეზიდენტმა ფეისბუქ-ლაივში.