აშშ-ის სურსათისა და წამლების ადმინისტრაციამ (FDA) Covid-19-ის სამკურნალოდ Pfizer-ის ანტივირუსულ აბ პაქსლოვიდის გადაუდებელი გამოყენების ავტორიზაცია გასცა.

12 წლის და უფროსი ასაკის მაღალი რისკის მქონე ადამიანებს, რომლებიც იწონიან მინიმუმ 40 კილოს და კორონავირუსი აქვთ დადასტურებული, ექიმის დანიშნულებით, სამკურნალოდ ამ პრეპარატის მიღება შეეძლებათ.

FDA-ს თანახმად, აბის მიღება პაციენტმა Covid-19-ის გამოვლენისთანავე უნდა დაიწყოს და წამალი სიმპტომების დაწყებიდან ხუთი დღის განმავლობაში უნდა მიიღოს.

პაქსლოვიდი აერთიანებს ახალ ანტივირუსულ პრეპარატს, სახელად ნირმატრელვირსა და რიტონავირს და ინიშნება სამი აბის სახით, დღეში ორჯერ ხუთი დღის განმავლობაში.

გასულ კვირას Pfizer-მა კვლევის განახლებული შედეგები გამოაქვეყნა, რომლის თანახმად, პირველი სიმპტომიდან რამდენიმე დღეში აბის მიღების შემთხვევაში მკურნალობა ჰოსპიტალიზაციის ან სიკვდილის რისკს 89%-ით ამცირებს.