თბილისში, ნუცუბიძის გამზირზე არასრულწლოვნის დაჭრის ბრალდებით პოლიციამ ერთი ადამიანი დააკავა. შინაგან საქმეთა სამინისტროს განცხადებით, ბრალდებული 20 წლის პირია და მან 15 წლის მოზარდს დაზიანებები ცივი იარაღით მიაყენა.

"მიმდინარე წლის 18 დეკემბერს ნ.თ.-ს შელაპარაკება მოუვიდა არასრულწლოვანთან — 2006 წელს დაბადებულ ლ.ს.-სთან, რა დროსაც მას ცივი იარაღით ჭრილობები მიაყენა და შემთხვევის ადგილიდან მიიმალა. ლ.ს. საავადმყოფოში გადაიყვანეს, სადაც შესაბამისი სამედიცინო დახმარება გაეწია", — აცხადებენ შსს-ში.

მათივე ინფორმაციით, ბრალდებული თბილისში დააკავეს. უწყებაში აცხადებენ, რომ გამოძიება სისხლის სამართლის კოდექსის 117-ე მუხლის მე-5 ნაწილის "ა" ქვეპუნქტით მიმდინარეობს, რაც არასრულწლოვნის მიმართ ჩადენილ ჯანმრთელობის განზრახ მძიმე დაზიანებას გულისხმობს. დანაშაული 7-დან 10 წლამდე ვადით თავისუფლების აღკვეთას ითვალისწინებს.

განახლება: სხვადასხვა მედიაში ვრცელდა ინფორმაცია, რომ ბრალდებული პოლიციას თავად ჩაბარდა.