ევროკავშირის მართლმსაჯულების სასამართლომ 14 დეკემბერს მიიღო გადაწყვეტილება, რომლის მიხედვითაც ორგანიზაციის წევრმა 27-მა ქვეყანამ ლგბტქ მშობლები და მათი შვილები ოჯახად უნდა ცნოს.

აღნიშნულ გადაწყვეტილებას წინ საქმის განხილვა უძღოდა, რომელიც ბულგარეთის მოქალაქე კალინა ივანოვასა და გაერთიანებული სამეფოს მოქალაქე ჯეინ ჯოუნსის სარჩელის საფუძველზე დაიწყო. ივანოვამ და ჯოუნსმა სარჩელი სასამართლოში მას შემდეგ შეიტანეს, რაც ევროკავშირის წევრმა ბულგარეთმა წყვილის ახალშეძენილი ბავშვისთვის დაბადების მოწმობის გაცემაზე უარი განაცხადა. ამის მიზეზი კვლავაც ის გარემოებაა, რომ ბულგარეთი ერთი და იმავე სქესის წყვილების ქორწინებას არ ცნობს.

რადგან წყვილის შვილი, სარა, ესპანეთში დაიბადა, იქ დაბადების მოწმობაში ბავშვის მშობლებად ორივე მათგანი მიუთითეს. თუმცა, სარას ბულგარეთის მოქალაქეობა სჭირდებოდა, ამიტომ მშობლებმა ქვეყნის შესაბამის უწყებას მიმართეს.

"ესპანეთის ამჟამინდელი კანონმდებლობით, ბავშვი ქვეყნის მოქალაქეობას ვერ მიიღებდა, რადგან არც კალინა და არც ჯეინი ესპანეთის მოქალაქეები არ არიან. სარამ ვერც გაერთიანებული სამეფოს მოქალაქეობის მიღება შეძლო, რადგან ჯეინი გიბრალტარში დაიბადა და ბრიტანული კანონით ვერც ის შეძლებდა თავისი შვილისთვის მოქალაქეობის მიცემას", — აცხადებს ლგბტქ უფლებების დამცველი ორგანიზაცია ILGA-Europe.

თუმცა, სარასთვის მოქალაქეობის მიცემაზე ბულგარეთმაც უარი განაცხადა, რადგან მისი მშობლები ერთი და იმავე სქესის წყვილია. ამგვარად, იგი ესპანეთის გარეთ ვერც მოგზაურობას შეძლებდა და არც განათლების, ჯანდაცვისა და სოციალურ სერვისებზე ექნებოდა ხელმისაწვდომობა.

ფოტო: Getty Images

ევროკავშირის მართლმსაჯულების სასამართლოს განცხადებით კი, ორგანიზაციის მოქალაქეებს კანონით აქვთ მინიჭებული ქვეყნებს შორის თავისუფალი გადაადგილების უფლება, შესაბამისად, წევრმა სახელმწიფოებმა მშობლებსა და მათ შვილებს შორის კავშირი უნდა ცნოს.

სასამართლოს მიერ გავრცელებულ პრესრელიზში ასევე ნათქვამია, რომ ლგბტქ მშობლების ცნობა "არც ეროვნულ იდენტობას უქმნის საფრთხეს და არც სახელმწიფო პოლიტიკას" იმ ქვეყანაში, სადაც ერთი და იმავე სქესის წყვილების ქორწინება კანონიერი არ არის.

"გადაწყვეტილებით მოხარულები ვართ. ერთი სული გვაქვს, როდის მიეცემა სარას საჭირო დოკუმენტაცია და როდის შევძლებთ, მთელი ორი წლის შემდეგ, ჩვენი ოჯახები ისევ ვინახულოთ", — აცხადებენ ივანოვა და ჯოუნსი, — "ეს გადაწყვეტილება ძალიან მნიშვნელოვანია, რომ ოჯახი ვიყოთ, არა მხოლოდ ესპანეთში, არამედ ევროპის ნებისმიერ ქვეყანაში. და, როგორც იქნა, ეს დღეც დადგა. მას დიდი ხანი ველოდებოდით ჩვენც და ყველა ლგბტქ ოჯახი ბულგარეთსა და ევროპაში".