სახალხო დამცველის შექმნილმა კონსილიუმმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი განცხადებით, სააკაშვილს პოსტტრავმული სტრესული აშლილობა აქვს. ნევროლოგმა თენგო წულაძემ განაცხადა, რომ მდგომარეობა საყურადღებოა და ნევროლოგიური სიმპტომატიკიდან რჩება პათოლოგიები.

"ნევროლოგიური სიმპომატიკიდან რჩება გარკვეული პათოლოგია — მზერის პარეზი, წონასწორობის დარღვევა, ზოგადი სისუსტე. ასევე გამოხატულია ანემია, ფსიქიური თვალსაზრისით არის ზომიერი და მძიმე დეპრესია და პოსტტრავმული სტრესული აშლილობა, ჩვენი მოსაზრებით.

პაციენტის სომატურ მდგომარეობას რაც შეეხება, მკურნალობა მიმდინარეობს და სტაბილურია, თუმცა, გვაქვს მოსაზრებები, რომელიც დეტალურად გავწერეთ დანართში და გადაეცემათ მათ ხელზე", — განაცხადა მან.

წულაძის თქმით, ჯერ კიდევ 25 ნოემბერს ფსიქოთერაპიის რეკომენდაცია გასცეს, თუმცა არ შესრულდა რაღაც მიზეზების გამო და ახლაც ამაზე აკეთებენ აქცენტს. მისივე თქმით, მნიშვნელოვანია ფიზიკური აბილიტაციაც.

"ნევროლოგიური დაავადებები ხშირად არ მთავრდება ერთ დღეში და ერთ კვირაში, ამიტომ ხანგრძლივად საჭიროებს რეაბილიტაციას. რეაბილიტაციას კიდევ ხელს უშლის დეპრესია, პოსტტრავმული სტრესული აშლილობაც და ფსიქოთერაპია ამ მხრივაც დაგვეხმარება, რომ რეაბილიტაცია სრული მოცულობით ჩატარდეს", — განაცხადა მან.

კითხვაზე, რეკომენდირებულია თუ არა ახლა მიხეილ სააკაშვილის კლინიკიდან ციხეში გადაყვანა, ის პასუხობს, რომ ადამიანი მკურნალობას უნდა გადიოდეს ისეთ ადგილას, რომელიც სტრესს არ ახსენებს. მისივე თქმით, მან სტრესი განიცადა გლდანის ციხეში გადაყვანით და ე.წ. შუმოკით.

"რადგან ადამიანს პოსტტრავმული-სტრესული აშლილობა აქვს, ეს გულისხმობს იმას, რომ ტრავმა ზუსტად იქ მიიღო, პენიტენციურ დაწესებულებაში, ყველაზე მეტად გლდანში. ამიტომ იქ გადაყვანას ჩვენ არ ვუჭერთ მხარს, იმ გაგებით, რომ პოსტტრავმული-სტრესული აშლილობის მკურნალობა უნდა მოხდეს იმ გარემოში, რომელიც იმ სტრესს არ აგონებს ადამიანს, სადაც სტრესი მიიღო".

ექსპერტთა ჯგუფი მიიჩნევს, რომ არასაკმარისი სიმძლავრით მიმდინარეობს ფიზიკური რეაბილიტაცია და მკურნალობის ამ რგოლს, შესაძლოა, ხელი შეუწყოს ფსიქოთერაპიის დროულმა დაწყებამ.

"ფსიქოთერაპიული ჩარევების, მოცულობისა და მეთოდების განსაზღვრის მიზნით, ჩატარდეს შესაბამისი დამატებითი კვლევები ამ სფეროს (მათ შორის, ფსიქოტრავმის სპეციალისტების) პროფესიონალების ჩართულობით; ფიზიკური რეაბილიტაცია; ფარმაკოლოგიური მკურნალობის კორექცია დანართში მოცემული დეტალური რეკომენდაციების შესაბამისად", — ვკითხულობთ განცხადებაში.

კონსილიუმის წევრებს ჟურნალისტებმა ექსპრეზიდენტის შესაძლო ფარმაკოლოგიურ წამებაზეც ჰკითხეს. ექიმებმა განაცხადეს, რომ ამის ნიშნებს ვერ ხედავენ და დანიშნულების მიხედვით ფსიქოტროპული მედიკამენტები სააკაშვილს ჭარბად არ მიუღია. მათივე თქმით, ამას სჭირდება გამოკვლევა. როგორც ექიმმა აღნიშნა, ერთ-ერთ კონსილიუმში მას მისცეს ისეთი დოზა, რომელსაც არ ეთანხმებიან, თუმცა ესეც თერაპიულ სიგანეში ჯდებოდა და არ იყო ტოქსიური დოზით.

"მე გავეცანი მხოლოდ იმ მედიკამენტებს, სათითაოდ გავეცანი დანიშნულების ფურცლებს, რომლებიც მას აქვს დანიშნული გორის ჰოსპიტალში გადაყვანის შემდეგ. აქ დოზები ნამდვილად არ ტოვებს შთაბეჭდილებას, რომ ვინმეს მისი ფარმაკოლოგიური წამება უნდოდა. რა იყო სხვა დაწესებულებებში არ ვიცი, მაგრამ გავეცანი ჩემი კოლეგების კონსულტაციებს, სადაც ბატონი მიხეილის მონაყოლის მიხედვით არის დაფიქსირებული, რა წამლებს იღებდა. იქ არის მაქსიმუმი დოზა წამლის [სახელი დაშიფრულია], რომელიც მას დანიშნული ჰქონდა 100 მილიგრამი და თუ ამაზე ვერ დაიძინებდა, უმატებდნენ 50 მილიგრამს, ზოგჯერ მისი თხოვნითაც. ის, რომ მას შემდეგ 200 მილიგრამი დაუნიშნა ერთ-ერთმა კონსულტანტმა დაასაბუთა იმით, რომ 150 უკვე მიღებული ჰქონდა და შეიძლება ზომის მომატება", — განაცხადა მარინა კურატაშვილმა.

რაც შეეხება საზღვარგარეთ გადაყვანას, ფსიქოთერაპევტის განცხადებით, ჯერ უნდა ჩამოიწეროს მისი საჭიროებები და შემდეგ განისაზღვროს, რამდენად არის შესაძლებელი მათი დაკმაყოფილება საქართველოში.

სახალხო დამცველის მიერ შექმნილმა ექსპერტთა/სპეციალისტთა ჯგუფმა სააკაშვილი 12 დეკემბერს მოინახულა. ეს მათი მეოთხე ვიზიტი იყო. ვიზიტში მონაწილეობა მიიღეს ექსპერტებმა: აიდა გოზალოვამ, თენგიზ წულაძემ, გიორგი კაჭარავამ, ნინო ზავრაშვილმა, გრიგოლი ხურციძემ, გიორგი პაპიაშვილმა, გიორგი გრიგოლიამ და მარინე კურატაშვილმა.

ომბუდსმენის განცხადებით, 9 ექიმმა მოამზადა დასკვნა, რომელიც შედგება 2 ნაწილისგან — ერთი არის საჯარო გამოყენებისთვის, მეორე უფრო ვრცელი ნაწილი, არის დეტალური კლინიკური გამოკვლევის შედეგები.