დღეს, 8 დეკემბერს გამართულ სხდომაზე საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთის 0,5 პროცენტული პუნქტით, 10,5%-მდე გაზარდის გადაწყვეტილება მიიღო. როგორც ცნობილია, აღნიშნული განაკვეთი ამაზე მაღალი ბოლოს 2008 წელს იყო.

რეფინანსირების განაკვეთის ზრდა ეროვნული ბანკის მხრიდან გამკაცრებული მონეტარეული პოლიტიკის გაგრძელებად შეგვიძლია მივიჩნიოთ, რაც, თავის მხრივ, ქვეყანაში არსებული მაღალი ინფლაციით არის გამოწვეული.

რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს. როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ. შესაბამისად, ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.

რეფინანსირების განაკვეთის ზრდის შედეგად 169,7 ათას ადამიანს სესხის პროცენტი 0,5 პროცენტული პუნქტით გაუძვირდა. სებ-ის ინფორმაციით, 1-ლი ნოემბრის მდგომარეობით ცვლადი საპროცენტო განაკვეთით სწორედ 169,7 ათასი სასესხო ხელშეკრულებაა გაფორმებული.

დღეს გამართულ სხდომაზე რეფინანსირების განაკვეთის ზრდა იმაზე მიანიშნებს, რომ ეროვნული ბანკი მომდევნო თვეებშიც მაღალ ინფლაციას ელოდება. როგორც სებ-ის მიერ გავრცელებულ განცხადებაშია ნათქვამი, მოსალოდნელია, რომ ინფლაცია 2022 წლის გაზაფხულიდან შემცირდება.

აღსანიშნავია, რომ ნოემბერში წლიური ინფლაცია 12,5%, ხოლო თვიური ინფლაცია 0,6% იყო. თუ მიმდინარე წლის აგვისტოს და ოქტომბრის თვეებს არ ჩავთვლით, წლიური ინფლაციის ამაზე მაღალი მაჩვენებელი ბოლოს 2011 წელს დაფიქსირდა.

საქართველოს ეროვნული ბანკის წინასწარი შეფასებით, საგარეო ფაქტორების წვლილი ნოემბრის წლიურ ინფლაციაში დაახლოებით 9 პროცენტულ პუნქტს უტოლდება. სებ-ის თქმით, ამ ფაქტორთაგან მნიშვნელოვანია საერთაშორისო სასაქონლო ბაზრებზე ფართო მოხმარების პროდუქტებზე ფასების ზრდა, რომელიც ადგილობრივ ბაზარს იმპორტირებული ნედლეულისა და პროდუქციის გავლენით გადმოეცემა.

საერთაშორისო სავალუტო ფონდი მიმდინარე წლის ბოლოს ქვეყანაში 13,05%-იან ინფლაციას ელოდება. IMF-ის გათვლებით, ამ მაჩვენებლით საქართველო მსოფლიოში მე-16 ადგილს დაიკავებს.