დღეს, 27 მაისს, პარლამენტის პლენარული სხდომა საქართველოს კონსტიტუციაში ცვლილების შეტანის თაობაზე, საკითხის განხილვას დაეთმო. ცვლილების მიხედვით, უნდა განისაზღვროს ქორწინების დეფინიცია - როგორც ქალისა და მამაკაცის ერთობა.

მანანა კობახიძის განცხადებით, შესაძლოა აღნიშნულ საკითხთან დაკავშირებით რეფერენდუმი გაიმართოს, იმ შემთხვევაში, თუკი პროექტი საჭირო 113 ხმას ვერ მაოგროვებს.

მან დეპუტატებს საყოველთაო-სახალხო განხილვის საორგანიზაციო კომისიის მუშაობის ანგარიში წარუდგინა და განაცხადა, რომ 1 თვის განმავლობაში კომისიამ საქართველოს სხვადასხვა რეგიონში საკონსტიტუციო ცვლილების საყოველთაო განხილვა ჩაატარა.

რესპუბლიკელების თავმჯდომარემ, დავით ბერძენიშვილმა საკითხის განხილვიდან მოხსნის წინადადება დააყენა. მისი თქმით, მოცემულ სიტუაციაში საკონსტიტუციო ცვლილებისთვის აუცილებელი 113 ხმის მოგროვება შეუძლებლია.

ქართული ოცნება - მრეწველების ფრაქციის წევრმა, ზურაბ ტყემალაძემ საკონსტიტუციო ცვლილების მიღების აუცილებლობაზე ისაუბრა. მისი განცხადებით, ქორწინების თაობაზე მომზადებული ცვლილება საქართველოს მოსახლეობის მოთხოვნას წარმოადგენს, რაც განხილვების დროს გამართულ შეხვედრებზე კიდევ უფრო მკაფიო გახდა.

მანანა კობახიძის განცხადებით, ანტიდისკრიმინაციული კანონის მიღების წინაც ადგილი ჰქონდა ერთგვარ დაპირისპირებას და საკითხის სხვადასხაგვარად ინტერპრეტაცია ხდებოდა, მაგრამ პარლამენტმა მაშინ შეძლო და მიიღო აღნიშნული კანონი.

მისივე თქმით, აუცილებელია ქორწინების დეფინიციასთან დაკავშირებით კონსტიტუციაში მკაფიო ჩანაწერის გაკეთება.

2016 წლის 10 მარტს პარლამენტის 80 წევრის ინიციატივით პარლამენტს წარედგინა საკონსტიტუციო კანონპროექტი, რომელიც კონსტიტუციის 36-ე მუხლის დაზუსტებას შეეხებოდა. აღნიშნული მუხლი, რომელიც ქორწინების დეფინიციას შეეხება, ცვლილების თანახმად შემდეგნაირად ყალიბდება - ქორწინება, რომელიც არის ოჯახის შექმნის მიზნით ქალისა და მამაკაცის ნებაყოფლობითი კავშირი, ემყარება მეუღლეთა უფლებრივ თანასწორობას.