მაშინ, როცა მსოფლიოს ზოგიერთ ქვეყანაში, მათ შორის — საქართველოში, კოვიდსაწინააღმდეგო აცრის მსურველთა და ორჯერ აცრილთა რიცხვი მაღალი არაა, იტალიის პატარა ქალაქ პალაცო ადრიანოში მოსახლეობის 104%-ია აცრილი. ამ მაჩვენებლის მიზეზი ისაა, რომ იტალია აცრილი ადამიანების რიცხვს კონკრეტულ დასახლებულ პუნქტში ოფიციალურად რეგისტრირებული ადამიანების მიხედვით ითვლის. პალაცო ადრიანოში კი ოფიციალურად რეგისტრირებული მოსახლეობის გარდა, მეზობელი სოფლებიდან ჩამოსული ან დროებით მცხოვრები ადამიანებიც აიცრნენ. ზოგიერთმა უკვე მესამე დოზის გაკეთებაც კი მოასწრო.

"სტატისტიკა ნამდვილს არ ჰგავს, თუმცა პალაცო ადრიანოში აქ მცხოვრები ადამიანები, მიუხედავად იმისა, რომ ოფიციალურად არ არიან რეგისტრირებულნი და მეზობელ სოფლებში მცხოვრები ადამიანებიც აიცრნენ", — აცხადებს პალაცო ადრიანოს მერი ნიკოლო გრანა.

პალაცო ადრიანო, რომელშიც ოსკაროსანი ფილმი Cinema Paradiso გადაიღეს, იტალიის 5 500 დასახლებული პუნქტიდან ერთ-ერთია, სადაც მოსახლეობის რაოდენობა 5 000-ზე ნაკლებია. პალაცო ადრიანოში 2 100 ადამიანია რეგისტრირებული და იმის გამო, რომ ახალგაზრდების უმეტესობა სამსახურის საძებნელად ქალაქიდან მიდის, მოსახლეობის საშუალო ასაკი 60 წელია. ქალაქში ასაკის გამო რისკჯგუფში მყოფი უამრავი ადამიანი ცხოვრობს, რის გამოც ქალაქის წარმომადგენლები შიშობდნენ, რომ კორონავირუსის გავრცელება სავალალო შედეგით დასრულდებოდა.

ქალაქში ვაქცინაციის კამპანია საკმაოდ წარმატებული აღმოჩნდა და ამაში უდიდესი წვლილი თავად მოსახლეობას მიუძღვის. იმის გამო, რომ პალაცო ადრიანოში ერთმანეთს თითქმის ყველა კარგად იცნობს, ქალაქის ოფიციალური წარმომადგენლები ყოველ შემხვედრს ვაქცინაციის აუცილებლობაზე ესაუბრებოდნენ. ქალაქის წარმომადგენლის, სალვატორ სპატას მიხედვით, მეორე დღეს ერთ ოჯახის წევრს ვაქცინის გასაკეთებლად სხვა წევრები და ნათესავები მოჰყავდა.

"ვაქცინაციის პუნქტებში საზეიმო განწყობა სუფევდა. იქაურობა ქალაქის პოპულარულ დღესასწაულებს მოგაგონებდათ. ხალხს ესმოდა, რომ ვაქცინის გაკეთებით ერთგვარ ფარს ქმნიდნენ, რომელიც საზოგადოების დაცვასა და მთლიანი სოფლის გადარჩენას უზრუნველყოფდა", — ამბობს ქალაქის მერი.

მერის თქმით, ვაქცინაციის ირგვლივ გაჩენილი კითხვებისთვის პასუხების გასაცემად და დეზინფორმაციის წინააღმდეგ საბრძოლველად მოქალაქეებმა WhatsApp-ის ჩატი შექმნეს. შედეგად, თითოეულმა მათგანმა სწორი ინფორმაცია მიიღო, რის შემდეგაც აცრა გადაწყვიტეს.

"აქ ყველა ერთმანეთს ვიცნობთ. ხალხის დარწმუნება მარტივი იყო. აცრით სხვებს ვიცავთ, პალაცო ადრიანოში კი სხვების დაცვა შენი შვილების, მეგობრების შვილებისა და ნათესავების დაცვას ნიშნავს", — ამბობს ქალაქის ერთ-ერთი მცხოვრები, 64 წლის ნიკოლა ლონგო.

"ზოგი ამბობს, რომ ევროპის სხვა ქვეყნებში ხალხი ძველ ცხოვრებას დაუბრუნდა, თუმცა მე ვფიქრობ, რომ ძველი ცხოვრების დაბრუნება მაშინ, როცა იცი, რომ შენ გვერდით მყოფი ადამიანი, შენი მეგობარი და ბარში მყოფი ადამიანები აცრილები არიან, უფრო დაცულად და თავისუფლად გაგრძნობინებს თავს", — ამბობს ქალაქის მერი.