პარტია საქართველოსთვის გენერალურმა მდივანმა, კახაბერ ქემოკლიძემ ბათუმის საკრებულოს გარდაცვლილ წევრზე, ნუგზარ ფუტკარაძეზე საუბრისას ამავე საკრებულოს წევრი, ყოფილი თანაპარტიელი ირაკლი თავდგირიძე გაიხსენა. მისი შეფასებით, ფუკარაძემ "მორალური ტესტი" ჩააბარა, თავდგირიძემ კი — ვერა.

"ბატონმა ფუტკარაძემ, ამ ტრაგიკული მოვლენის მიუხედავად, რომელიც გარდაიცვალა და ვუსამძიმრებ მის ოჯახს, მორალური ტესტი ჩააბარა ღირსებასთან, რაც, სამწუხაროდ, ვერ ჩააბარა ბატონმა თავდგირიძემ, რომელიც ჩვენი პარტიის წევრი იყო.

ამ პროცესში ერთ-ერთი ჩვენი გუნდელის ცნობილ გამონათქვამს გამოვიყენებ — მან სვლა გააკეთა და ეს სვლა უკან არ ბრუნდება. ის პოლიტიკურ ფასს ამ კუთხით აუცილებლად გადაიხდის", — განაცხადა ქემოკლიძემ TV პირველის ეთერში.

ირაკლი თავდგირიძე პარტია საქართველოსთვის აჭარის ორგანიზაციის ხელმძღვანელი იყო და ბათუმის საკრებულოში სწორედ ექსპრემიერის პარტიული სიით მოხვდა. არჩევნების შემდეგ მან პარტია დატოვა და ამ ეტაპზე დამოუკიდებელი დეპუტატის სტატუსი აქვს. თუმცა, გამომდინარე იქედან, რომ თანამდებობიდან გადადგომისას განაცხადა, რომ მისთვის "კატეგორიულად მიუღებელია ნაცმოძრაობასთან (ლელოს ჩათვლით) ნებისმიერი სახით თანამშრომლობა", ის საკრებულოში ქართული ოცნების ინტერესების გამტარებლად მოიაზრება. აღსანიშნავია, რომ თავდგირიძის მიერ პარტიის დატოვებამდე ქართული ოცნების წევრებს, მაგალითად სოზარ სუბარს, არაერთხელ უთქვამს, რომ საკრებულოში შესულ ოპოზიციონერ დეპუტატების "სწორ მხარეს" გადასვლაზე ესაუბრებიან.

ნუგზარ ფუტკარაძე ბათუმის საკრებულოში ნაციონალური მოძრაობის მაჟორიტარი იყო. ის 18 ნოემბერს გარდაიცვალა. 24 ნოემბერს პარტიამ სპეციალური ბრიფინგი გამართა და მის გარდაცვალებაში ქართული ოცნება დაადანაშაულა. კერძოდ, ენმ-ში აცხადებენ, რომ ფუტკარაძეზე აჭარის მთავრობის თავმჯდომარის, თორნიკე რიჟვაძის მამა, ძალოვანი უწყების მოქმედი მაღალჩინოსანი, დავით რიჟვაძე ზეწოლას ახდენდა. აღსანიშნავია, რომ ენმ დავით რიჟვაძეს ოპოზიციონერი წევრების მუქარაში იქამდეც ადანაშაულებდა.

თავდაპირველად ბათუმის საკრებულოში მანდატები ასე იყო გადანაწილებული: ქართული ოცნება — 16 მანდატი, ნაციონალური მოძრაობა — 15 მანდატი, საქართველოსთვის — 3 მანდატი, ლელო — 1 მანდატი; ამ მოცემულობით მმართველ პარტიასა და ოპოზიციას შორის უმრავლესობის მოსაპოვებლად და შესაბამისად, თავმჯდომარის ასარჩევად ხმებს შორის თანაფარდობა იყო 16/19-ზე. თავდგირიძის მიერ გახარიას პარტიის დატოვებისა და ენმ-სა და ლელოსთან თანამშრომლობაზე უარის თქმის შემდეგ, როგორც უკვე აღვნიშნეთ, ის ქართული ოცნების მხარეს მოიაზრება და შესაბამისად თანაფარდობა შეიცვალა ასე — 17/18. ნუგზარ ფუტკარაძის გარდაცვალების შემდეგ ოპოზიციამ ბათუმის საკრებულოში უმრავლესობა დაკარგა. ფუტკარაძის შემცვლელს ბათუმელები გაზაფხულზე, შუალედური არჩევნებზე აირჩევენ, იქამდე კი საკრებულოს თავმჯდომარის არჩევის პროცესი, შესაძლოა, ჩიხში შევიდეს.

აღსანიშნავია, რომ რამდენიმე დღის წინ, ექსპრემიერის პარტიამ განაცხადა, რომ საკრებულოებში, სადაც მათი სიით გასული დეპუტატებს "გადამწყვეტი ხმა" აქვთ, თავმჯდომარის პოზიციაზე საკუთარ კანდიდატებს წარადგენენ.