მიხეილ სააკაშვილის პირადი ექიმის, ნიკოლოზ ყიფშიძის განცხადებით ექსპრეზიდენტს ჯანმრთელობის მდგომარეობა ხელს უწყობს, რომ ხვალ, საკუთარ სასამართლო პროცესზე მისვლა მოახერხოს. ეს განცხადება ყიფშიძემ ცოტა ხნის წინ, გორის ჰოსტიპლის დატოვების შემდეგ გააკეთა.

"ბატონი პრეზიდენტი ელოდება ხვალინდელ დღეს მოუთმენლად. ხვალ, თვითონ იხილავთ ალბათ, ყველა, როგორ არის [...] ჯანმრთელობის მდგომაროება ხელს უწყობს იმას, რომ ხვალ იყოს სასამართლოში", — განაცხადა ყიფშიძემ.

რაც შეეხება გიორგი ჩალაძის მიერ გავრცელებულ ინფორმაციას ექსპრეზიდენტის პალატასთან მდგარი მანქანის შესახებ, "რომელიც ასხივებს ელექტრომაგნიტურ ტალღებს", ყიფშიძემ განაცხადა, რომ ფაქტს ვერ დაადასტურებს, თუმცა აღნიშნა, რომ მსგავსი გამოსხივება არა თუ სააკაშვილისთვის, არამედ ყველასთვის საშიშია.

ხვალ, 29 ნოემბერს, 11:00 საათზე თბილისის საქალაქო სასამართლოში მიხეილ სააკაშვილის მორიგი სასამართლო პროცესი გაიმართება. აქციის პარალელურად ოპოზიციამ თბილისის საქალაქო სასამართლოსთან ექსპრეზიდენტის მხარდამჭერი აქცია დააანონსა. იქამდე, თავად სააკაშვილმა მოუწოდა მხარდამჭერებს შეკრებისკენ. ჯერჯერობით უცნობია, მისცემს თუ არა იუსტიციის სამინისტრო მას საკუთარ სასამართლო სხდომაზე დასწრების საშუალებას.

22 ნოემბერს იუსტიციის მინისტრმა განაცხადა, რომ ვინაიდან ექსპრეზიდენტმა შიმშილობა შეწყვიტა, გამოირიცხა ერთი ფაქტორი, რომლის გამოც ის სასამართლოში არ მიჰყავდათ. მისივე თქმით, ექიმების შესაბამისი დასკვნის შემთხვევაში, შესაძლოა, შემდგომ სასამართლო პროცესზე დარბაზში მიიყვანონ.

ბრეგაძის მტკიცებით, სხდომაზე არ მიყვანას 2 მთავარი ფაქტორი ჰქონდა: უსაფრთხოება და სააკაშვილის ჯანმრთელობის მდგომარეობის მკვეთრად გაუარესების რისკი. ის ვრცლად საუბრობს მეორეზე, თუმცა დეტალურად არ განიხილავს პირველს — უსაფრთხოებას.