გასულ ხუთშაბათს Latin Grammy Awards-ის ცერემონიაზე კრისტინა აგილერას რეპორტიორმა ჰკითხა, ჰქონდა თუ არა მას ამ 13-წლიანი მეურვეობის დროს ბრიტნი სპირსთან კომუნიკაცია. აგილერას პრეს-აგენტმა მომღერალს პასუხის გაცემა არ აცადა და ჟურნალისტებს თავად უპასუხა: "არა, დღეს ჩვენ ამაზე არ ვისაუბრებთ, ვწუხვარ".

წასვლამდე აგილერამ ჟურნალისტებს მოკლედ უთხრა, რომ ამაზე საუბარი არ შეუძლია, მაგრამ ბრიტნის ამბის გამო ძალიან ბედნიერია.

ბრიტნი სპირსმა აგილერას ეს ქმედება გააკრიტიკა და თავის ინსტაგრამზე შემდეგი წარწერით პოსტი დადო: "მე ძალიან მიყვარს და ვაღმერთებ იმ ადამიანებს, რომლებმაც მხარი დამიჭირეს. მაგრამ ლაპარაკზე უარის თქმა, როცა სიმართლე იცი, სიცრუის ტოლფასია!!!! კორუმპირებულ და დამამცირებელ სისტემაში 13 წლის ყოფნის შემდეგაც კი, რატომ არის ასე რთული ხალხისთვის ამ თემაზე საუბარი? მე ვარ ის, ვინც ეს ყველაფერი გადაიტანა. ყველა ადამიანს, რომელმაც მხარი დამიჭირა, დიდ მადლობას ვუხდი".

ბრიტნი სპირსმა და კრისტინა აგილერამ პოპულარობა ერთდროულად მოიპოვეს, როცა 1993-1994 წლებში დისნეის The Mickey Mouse Club-ში მიიღეს მონაწილეობა. საერთაშორისო აღიარებასა და ვარსკვლავობის ეტაპს ორივე მომღერალმა თინეიჯერობის პერიოდში მიაღწია.

2021 წლის ივნისის სასამართლო პროცესის შემდეგ, როცა ბრიტნიმ მისი ახლობელი ადამიანები ძალადობაში დაადანაშაულა, აგილერამ მათი ბავშვობის ფოტო გამოაქვეყნა და მომღერალს მხარი დაუჭირა. "ბოლო რამდენიმე დღეა იმ ყველაფერზე ვფიქრობ, რასაც ბრიტნი განიცდის. მიუღებელია, რომ ნებისმიერ ქალს ან ადამიანს, რომელსაც სურს საკუთარი ცხოვრება თავად აკონტროლოს, ამის უფლება არ მისცე", — ვკითხულობთ აგილერას პოსტში.

მართალია, კრისტინა აგილერამ ბრიტნის სპირსის შესახებ დასმულ შეკითხვას თავი აარიდა, მაგრამ ლედი გაგამ ამ საკითხის შესახებ ვრცლად ისაუბრა. მისი აზრით, როგორც ბიზნესი ბრიტნის სპირსს მოექცა, არასწორი იყო. "ვფიქრობ, რომ ბრიტნი სამუდამოდ ქალების შთაგონება იქნება", — დასძინა მომღერალმა. ამ განცხადების გამო ბრიტნიმ ლედი გაგას პოსტი მიუძღვნა და მადლობა საჯაროდ გადაუხადა.

"ამ ბიზნესში ბრიტნი ერთ-ერთი ქალი იყო, რომელმაც ახალგაზრდობაშიც კი დიდი გამბედაობა გვაჩვენა და ჩემთვის ის შთაგონების წყაროს წარმოადგენდა. მას ყველამ მხარი უნდა დავუჭიროთ, რადგან ერთადერთი ადამიანი, ვინც საბოლოოდ მისი ცხოვრება შეცვალა, ეს თავად ბრიტნი იყო. ამ ბრძოლაში გამარჯვების გამო მე მისი მჯერა და მომავალში ყველაფერ საუკეთესოს ვუსურვებ", — ამბობს ლედი გაგა Variety-სთან ინტერვიუში.

შეგახსენებთ, რომ ბრიტნი სპირსი 13-წლიანი მეურვეობისგან სასამართლოს გადაწყვეტილებით რამდენიმე დღის წინ გათავისუფლდა. მომღერალი 2008 წლიდან მეურვეობის ქვეშ მენტალური ჯანმრთელობის გაუარესების საბაბით იმყოფებოდა.

ასევე იხილეთ: