პარასკევს, 12 ნოემბერს, ლოს-ანჯელესის სასამართლოს გადაწყვეტილებით, ბრიტნი სპირსი საბოლოოდ გათავისუფლდა მეურვეობისგან.

კანონიერი მეურვეობის ქვეშ ბრიტნი სპირსი 2008 წლიდან, თითქმის 14 წლის განმავლობაში იმყოფებოდა.

ამ სიახლემ 39 წლის პოპვარსკვლავის ფანები იმდენად გაახარა, რომ ქუჩაში გამოსვლებით აღნიშნეს სასამართლოს გადაწყვეტილება.

"მთელი დღე ვიტირებ... საუკეთესო დღეა ჩემს ცხოვრებაში", — ამ წარწერით გააზიარა ბრიტნიმ ტვიტერზე თავისი ფანების ზეიმის ვიდეო.

აღსანიშნავია, რომ მეურვეობის გაუქმების საქმეში უდიდესი როლი სწორედ ბრიტნი სპირსის ერთგულმა მსმენელებმა ითამაშეს: ფანებმა სოციალურ ქსელებში დაიწყეს მოძრაობა #FreeBritney (თავისუფლება ბრიტნის) და ამტკიცებდნენ, რომ მომღერალს სასამართლოს მიერ დანიშნული მეურვე, კონკრეტულად კი მამამისი, ჯეიმს სპირსი, არასათანადოდ ეპყრობოდა და თავისუფლებას საჭიროზე მეტად უზღუდავდა.

ბრიტნის კანონიერი მეურვე 2008 წელს მენტალური ჯანმრთელობის გაუარესების გამო დაუნიშნეს, რის შემდეგაც მის ფინანსებს, კარიერას და სამედიცინო საკითხებსაც კი მამამისი განკარგავდა.

2021 წლის ივნისში ბრიტნი სპირსი სასამართლოზე სიტყვით გამოვიდა და თითქმის ის ყველაფერი დაადასტურა, რასაც მის მეურვეობაზე ამბობდნენ: მომღერალმა აღიარა, რომ ტრავმირებულია, ახლობელი ადამიანები ძალადობაში დაადანაშაულა და სასამართლოს მიერ მისთვის დანიშნული მეურვეობის დასრულება მოითხოვა.

ამ შემთხვევიდან მალევე, აგვისტოში, ჯეიმს სპირსი შვილის მეურვეობაზე ჩამოშორებას დათანხმდა, თუმცა ბრიტნი კვლავ მეურვეობის ქვეშ რჩებოდა. ამ ახალი გადაწყვეტილებით კი ის მთლიანად გათავისუფლდა მეურვეობისგან: როგორც BBC წერს, უახლოეს მომავალში დროებითი მეურვე დაეხმარება ბრიტნის, რომ ფინანსური საკითხები მოაგვაროს, წლის ბოლომდე კი მას ეს წარმომადგენელიც ჩამოშორდება.

ასევე იხილეთ: