ბრიტნი სპირსი Instagram-ზე გამოქვეყნებულ ვიდეოში საჯაროდ ალაპარაკდა იმის შესახებ, თუ როგორია თავისუფლება თითქმის 14-წლიანი მეურვეობის შემდეგ.

შეგახსენებთ, რომ რამდენიმე დღის წინ სასამართლოს მიერ მიღებული გადაწყვეტილებით, ბრიტნი სპირსი კანონიერი მეურვეობისგან გათავისუფლდა, რომლის ქვეშაც 2008 წლიდან მენტალური ჯანმრთელობის გაუარესების საბაბით იმყოფებოდა.

პოპმომღერალი ახალ ვიდეოში გვიყვება, როგორია დიდი ხნის შემდეგ პირველად თავისუფალი ცხოვრება:

"დიდხანს ვიყავი ისეთ სიტუაციაში, რომელში ყოფნასაც არავის ვუსურვებ. ახლა კი თითოეული დღისთვის გულწრფელად მადლობელი ვარ", — ამბობს ბრიტნი ვიდეოში.

რადგან სასამართლოს დანიშნული მეურვის მიერ მის ფინანსებზე, კარიერასა და ყოველდღიურ ცხოვრებაზე კონტროლი დასრულდა, მომღერალი აღნიშნავს, რომ ახლა დამოუკიდებლად შეუძლია ბევრი ისეთი რამის გაკეთება, რაც აქამდე ძალიან ენატრებოდა:

"ყოველი დღით უზომოდ მადლიერი ვარ, რომ მაქვს საშუალება, ჩემი მანქანის გასაღები თან მქონდეს და თავი დამოუკიდებელ ქალად ვიგრძნო; მიხარია, რომ შემიძლია საკრედიტო ბარათის გამოყენება, [დიდი ხნის შემდეგ] პირველად ვხედავ ნაღდ ფულს და მაქვს შესაძლებლობა, სანთლები ვიყიდო", — ამბობს ის ვიდეოში.

"ეს წვრილმანი რაღაცებია, მაგრამ მაინც დიდი მნიშვნელობის მქონე და ამისთვის ძალიან მადლობელი ვარ.", — დასძინა მომღერალმა.

მას შემდეგ, რაც ივნისში მომღერალმა სასამართლოს სხდომაზე მეურვეობას "შეურაცხმყოფელი" უწოდა, ის პოსტებში საკუთარი გრძნობების შესახებ უფრო აქტიურად ალაპარაკდა და #FreeBritney მოძრაობასაც მადლობა გადაუხადა.

ფოტო: Getty Images

ბრიტნიმ განაცხადა, რომ მეურვეობის პერიოდში საკუთარი ცხოვრების უკან დაბრუნება სურდა და ახლა მზად არის, დაგროვილი გამოცდილებით სხვა ადამიანებს დაეხმაროს. "მე აქ მსხვერპლის როლში არ ვარ. მსხვერპლი მთელი ბავშვობა ვიყავი, შემდეგ კი გადავწყვიტე, სახლი დამეტოვებინა, 20 წელი ვიმუშავე და ამ ცვლილებას დიდი ძალისხმევის შედეგად მივაღწიე", — ამბობს მომღერალი.

"მე აქ იმისთვის ვარ, რომ სერიოზული დაავადებების მქონე ადამიანებს დავეხმარო. მე ძლიერი ქალი ვარ, რომელსაც იმის წარმოდგენა შეუძლია, თუ რა გაუკეთა ამ სისტემამ ადამიანებს. ვიმედოვნებ, რომ ჩემი პატარა ისტორია სხვებზე დიდ გავლენას მოახდენს და ამ კორუმპირებულ სისტემაში ცვლილებებს შეიტანს", — დასძინა მან.

ფოტო: Getty Images

მომღერალმა განსაკუთრებული მადლობა გადაუხადა თავის ერთგულ მსმენელებს, რომლებიც მისი გათავისუფლებისთვის დიდხანს დაუღალავად იბრძოდნენ:

"ჩემი ხმა დადუმებული იყო და დიდხნიანი მუქარის გამო მე არაფრის თქმა შემეძლო. თქვენი კი ჩემი სათქმელი სხვა ადამიანებამდე მიიტანეთ", — განაცხადა მომღერალმა #FreeBritney მოძრაობის შესახებ და ასე გადაუხადა მადლობა ფანებს, რომლებიც მთელი ამ დროის განმავლობაში სოციალურ ქსელებში ბრიტნის მდგომარეობას აპროტესტებდნენ და მის დახმარებას ცდილობდნენ.

ასევე იხილეთ: