ბიძინა ივანიშვილის ადვოკატ ვიქტორ ყიფიანის განცხადებით, გავრცელებულ ვიდეოში ივანიშვილის ფრაზა პრემიერმინისტრ ირაკლი ღარიბაშვილზე აბსოლუტურად კონტექსტიდან არის ამოვრადნილი. საუბარია ფრაზაზე, სადაც ივანიშვილი ამბობს, რომ ღარიბაშვილი, ფინანსებსა და იურისპრუდენციაში ვერ ერკვევა.

"აბსოლუტურად კონტექსტიდან ამოვარდნილია. კონტექსტში და სრულად მისი დამოკიდებულება და შეფასება ღარიბაშვილის მიმართ გამოიხატებოდა შემდეგნაირად, რომ იქ საუბარია რთულ საფინანსო პროდუქტებზე, ე.წ. წარმოებულ ფინანსურ პროდუქტებზე და, ამ შემთხვევაში, არა ბატონ ირაკლის, არამედ არაერთს და მრავალს ქართულ საფინანსო სფეროშიც კი ამის ცოდნა არ და ვერ ექნება ჩვენთან საფონდო ბაზრის განუვითარებლობის გამო", — განაცხადა ყიფიანმა იმედის ეთერში.

ადვოკატის თქმით, მან ძალიან ვრცელი შეფასება მისცა მის დამოკიდებულებას ღარიბაშვილისადმი, აღნიშნა რა, რომ წლების განმავლობაში ის მისი პოლიტიკური გუნდის ერთ-ერთი აქტიური და თვალსაჩინო მონაწილე იყო და, შესაბამისად, არაერთი საქებარი სიტყვით აღნიშნა მისი ნიშან-თვისებები.

ყიფიანმა, ასევე, თქვა, რომ სასამართლო პროცესზე ვიდეო და ფოტო გადაღების არსებული შეზღუდვა დაირღვა, რაც შესწავლის საგანია.

"ეს საქმე რეზონანსულია და ჩვენ უკვე ადგილობრივ ტელესივრცეში ვხედავთ გარკვეული ვიდეომასალების გავრცელებას. ეს ცალკე თემაა, რომელის შესწავლას მოითხოვს, რადგან ეჭვის დონეზე და ვარაუდების დონეზე მე მიჭირს ამ საკითხზე საუბარი. ერთი რამ ფაქტია, რომ გარკვეული ვიდეომასალა გავრცელდა. მინდა გითხრათ, რომ სასამართლოს წესებით, პროცესის მიმდინარეობისას, ნებისმიერი ფოტო და ვიდეო გადაღება იყო და არის აკრძალული. აქედან გამომდინარე ისმება კითხვა — ვინ გააკეთა ეს და რა მიზნით გააკეთა?", — აცხადებს ყიფიანი.

მისივე თქმით, თუ ლოგიკური გამორიცხვის მეთოდით ივლიან, გამორიცხულია მათი მხრიდან ეს ვინმეს გაეკეთებინა.

"თვითონ პროცესი საჯაროა, რაც ნიშნავს, რომ ნებისმიერ ადამიანს ვისაც სურვილი აქვს თვალი ადევნოს უნდა მიმართოს სასამართლოს და ის გადის შესაბამის რეგისტრაციას. ეს შეიძლება იყოს ნებისმიერი მედიის წარმომადგენელი. აქედან გამომდინარე ვვარაუდობ, რომ ასეთი დაშვება გაკეთდა დაინტერესებულ პირზე ან პირთა ჯგუფზე. აქ კანონი არ ირღვევა, თუმცა მოხდა ვიდეო და ფოტო გადაღებაზე არსებული შეზღუდვის დარღვევა და დღეს ეს მასალა გამოიყენება შიდა მოხმარებისთვის, რომელიც არცთუ დადებით ასოციაციებს იწვევს", — აღნიშნა ადვოკატმა.

ფორმულამ გაავრცელა ვიდეო, სადაც ჩანს, რომ ქართული ოცნების დამფუძნებელი ბიძინა ივანიშვილი, რომელიც ბერმუდის სასამართლოში ჩვენებას დისტანციურად აძლევდა, პრემიერმინისტრ ირაკლი ღარიბაშვილზე ამბობს, რომ ის მისთვის ავტორიტეტს არ წარმოადგენდა. ტელეკომპანიის ინფორმაციით, შვეიცარიული ბანკის იურისტმა ივანიშვილს ბევრჯერ ჰკითხა ხელშეკრულების გაფორმებისას რა როლი ჰქონდა ირაკლი ღარიბაშვილს, რომელიც ივანიშვილისა და ბანკის წარმომადგენლების ყველა შეხვედრას ესწრებოდა.

ვიდეოში ივანიშვილი, ასევე, ირწმუნება, რომ პოლიტიკაში ყოფნის დროს, რაც მოსახლეობას დაპირდა, შეასრულა.