ლელოს წევრები ექსპრეზიდენტის სამოქალაქო კლინიკაში გადაყვანას ითხოვენ და აცხადებენ, რომ ხელისუფლება მიხეილ სააკაშვილს განზრახ კლავს. მათივე განცხადებით, გლდანის ციხის საავადმყოფო, რეალურად, ამბულატორიის დონის დაწესებულებაც კი არ არის და ახლა არჩევანი სააკაშვილის გადარჩენას, ან მის სიკვდილს შორის დგას.

"ორი გამოსავალია, ან მიხეილ სააკაშვილი გადადის საავადმყოფოში, რასაც საავადმყოფო ქვია, ან ის მოკვდება. ამიტომაც, ჩვენი აქცია მიმდინარეობს ასეთი ლოზუნგით — დღეს ჩვენ ყველა მედიკოსები ვართ: ექიმები, ინჟინრები, მემანქანეები, იურისტები — ჩვენ ყველა ვართ ექიმები, ჩვენ ყველამ უნდა ვიზრუნოთ, რომ გადავარჩინოთ ადამიანის სიცოცხლე. დაუშვებელია, რაც ჩვენს ქვეყანაში ხდება, ეს არ ხდებოდა, ალბათ, არასდროს სხვა ქვეყანაში, როცა ხელისუფლება განზრახ კლავს ადამიანს", — განაცხადა პარტიის წევრმა, ვატო სურგულაძემ.

მანვე განაცხადა, რომ ერთი ადამიანის გადარჩენით, გადავარჩენთ მთელს საქართველოს.

ექსპრეზიდენტი უკვე 46 დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში გადაიყვანეს, სადაც იძულებით შეიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

13 ნოემბერს მისმა ექიმმა განაცხადა, რომ სააკაშვილი თავს ცუდად გრძნობდა და საწოლიდან ვერ ადგა. 14 ნოემბერს კი მან აღნიშნა, რომ ექსპრეზიდენტი სუსტად არის, მაგრამ სასამართლო პროცესზე დასწრება შეუძლია. სურვილის მიუხედვად, ის პროცესზე ისევ არ დაასწრეს.