ქართული ოცნების ერთ-ერთი ლიდერის, არჩილ თალაკვაძის განცხადებით, მან არ იცის, რა სამედიცინო ჩარევა სჭირდება ექსპრეზიდენტს ისეთი, რომ ერთი კლინიკიდან სხვაში გადაიყვანონ. თალაკვაძის მტკიცებით, გლდანის მე-18 სამედიცინო დაწესებულება მაღალპროფილურია და მას, როგორც მოქალაქეს კონსილიუმთან კითხვები აქვს.

"არ შეიძლება კონსილიუმს კითხვები დავუსვათ მოქალაქეებმა? ჩვენც გვაქვს კითხვები, თუ რეკომენდაცია გასცეს, გვითხრან კონკრეტულად, რა მაღალტექნოლოგიური ჩარევა სჭირდება დღეს მიხეილ სააკაშვილს ისეთი, რომ ის ერთი მულტიპროფილური კლინიკიდან უნდა გადავიყვანოთ სხვა მულტიპროფილურ კლინიკაში. მე არ მაქვს ამაზე პასუხი, როგორც პარლამენტარს და როგორც საზოგადოების წევრს", — განაცხადა მან რუსთავი 2-ის ეთერში.

თალაკვაძე ამბობს, რომ სახალხო კონსილიუმის რეკომენდაციები ბუნდოვანია და ის მანიპულაციის საგანია. მისივე აზრით, სააკაშვილი და მისი ადვოკატები ექიმებს სამედიცინო ინფორმაციის გამჭირვალედ გახმოვანების უფლებას არ აძლევენ.

"ყველამ ვიცით ოფიციალური წყაროებიდან და ეს ინფორმაცია არის უკვე დამაჯერებელი, იმიტომ, რომ ნაციონალური მოძრაობის ავბედითი პროგნოზების ფონზე სრულიად საპირისპირო დაინახა საზოგადოებამ, რომ სააკაშვილის ძირითადი ჯანმრთელობის მდგომარეობა, ანუ ძირითადი მონაცემები არის წესრიგში", — თქვა მან.

ექსპრეზიდენტი უკვე 46 დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში გადაიყვანეს, სადაც იძულებით შეიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

13 ნოემბერს მისმა ექიმმა განაცხადა, რომ სააკაშვილი თავს ცუდად გრძნობდა და საწოლიდან ვერ ადგა. 14 ნოემბერს კი მან აღნიშნა, რომ ექსპრეზიდენტი სუსტად არის, მაგრამ სასამართლო პროცესზე დასწრება შეუძლია. სურვილის მიუხედვად, ის პროცესზე ისევ არ დაასწრეს.