ნაციონალური მოძრაობის თავმჯდომარის, ნიკა მელიას განცხადებით, შინაგან საქმეთა სამინისტრომ ვერ გაიგო, რას აკეთებენ მსვლელობის მონაწილეები და ვერც გაიგებს. მისი თქმით, ძალა, რომელიც "რეჟიმს ეწინააღმდეგება", გაცილებით დიდი ინტელექტუალური უპირატესობით სარგებლობს.

"ახლა სპეცრაზმი იუსტიციის სამინისტროსა და შინაგან საქმეთა სამინისტროსთან გადაისროლეს, ჩვენ წამოვედით აქეთ, ისინი გამოგვყებიან უკან [...] კიდევ ერთხელ კარგად დაინახოს ყველამ, რას ნიშნავს არაძალადობრივი პროტესტი [...] ძალიან ტრაგი-კომიკური ვითარება არის შინაგან საქმეთა სამინისტროს ყველა დანაყოფში შექმნილი. არბენინებენ წინ და უკან, ვერ გაიგეს რას ვაკეთებთ და ვერც გაიგებენ, იმიტომ, რომ ის ძალა, რომელიც ეწინააღმდეგება რეჟიმს გაცილებით დიდი ინტელექტუალური, პასუხისმგებლიანი, მორალური, ზნეობრივი უპირატესობით სარგებლობს, ვიდრე მათ წარმოუდგენიათ", — აცხადებს ის.

დღეს ოპოზიციის აქციის პარალელურად სანაპიროზე საპოლიციო სპეცტექნიკა, მათ შორის, წყლის ჭავლისა და სახანძროს მანქანები გამოჩნდა. იქვე მდგარ ყვითელ ავტობუსებში კი მობილიზებულია სპეცრაზმი.

აქცია ექსპრეზიდენტ მიხეილ სააკაშვილის სამედიცინო დაწესებულებაში გადაყვანის მოთხოვნით იმართება. მოქალაქეები ავლაბრის მეტროსთან შეიკრიბნენ და მსვლელობით სანაპიროზე წავიდნენ, რაც წინასწარვე იყო დაანონსებული.

დღეს შინაგან საქმეთა სამინისტრომ ოპოზიციის მიერ დაანონსებულ, თბილისის ორივე სანაპიროზე გზების გადაკეტვაზე განაცხადა, რომ კანონის თანახმად, ტრანსპორტის სავალი ნაწილის გადაკეტვა დაუშვებელია და ამ წესის დარღვევა გამოიწვევს პასუხისმგებლობას ადმინისტრაციულ სამართალდარღვევათა კოდექსის შესაბამისად. შსს-ს თანახმად, საჭიროების შემთხვევაში, საზოგადოებრივი წესრიგის აღდგენის მიზნით, კანონით გათვალისწინებულ პროპორციულ ძალასა და სპეციალურ საშუალებებს გამოიყენებდნენ.

ნაციონალური მოძრაობის შეფასებით, უწყების ეს განცხადება მიმართულია დაგეგმილი აქციის ხელშესაშლელად და წარმოადგენს მშვიდობიანი დემონსტრანტების დაკავებების დაანონსებას. პარტიის თქმით, ყველა შესაბამისი უწყება 14 ნოემბერს საჯაროდ გააფრთხილეს, რომ მომდევნო დღეს მშვიდობიანი მსვლელობა იქნებოდა. მათივვე განმარტებით, ამის მიზანი იყო ის, რომ მოქალაქეთა უფლებების დასაცავად უწყებებს შესაბამისი ზომები მიეღოთ.