ადამიანის უფლებათა კომიტეტის თავმჯდომარე მიხეილ სარჯველაძე ირწმუნება, რომ ექსპრეზიდენტ მიხეილ სააკაშვილის უფლებები არ დარღვეულა. ამავდროულად, ის აღნიშნავს, რომ სააკაშვილის, როგორც პატიმრის, ნებისმიერი უფლება უნდა იყოს დაცული.

"თუ ადგილი აქვს რაიმე დარღვევას, ამას უნდა მოჰყვეს რეაგირება, თუმცა რასაც ჩვენ ამ დრომდე თვალს ვადევნებთ, მერწმუნეთ, რომ იქ უფლების დარღვევას ადგილი არ აქვს", — განაცხადა მან.

სარჯველაძე ეხმაურება Amnesty International-ის კრიტიკულ შეფასებას და აღნიშნავს, რომ ამ ორგანიზაციის მიერ უფლებების დარღვევის ნიშნების დანახვა მის დადასტურებას არ ნიშნავს.

"ნიშნებს ვხედავთ, ნიშნების ხედვა და დადასტურება ნიშნავს ამას? ნიშნის შემჩნევა ნიშნავს დადასტურებას? არა, მე ამას არ ვამბობ. პირიქით, თქვენ ამბობთ მცდარად, რომ... ე.ი. თქვენ ამბობთ, რომ Amnisty International-მა დაინახა უკვე დარღვევა. ეს ასე არ არის. ისინი ამბობენ, რომ ნიშნები შეინიშნება", — განაცხადა მიხეილ სარჯველაძემ.

Amnesty International ექსპრეზიდენტ მიხეილ სააკაშვილის ირგვლივ განვითარებულ მოვლენები შეაფასა და განაცხადა, რომ ეს არამხოლოდ შერჩევითი სამართალი, არამედ აშკარა პოლიტიკური შურისძიებაცაა.

8 ნოემბერს ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის პენიტენციური დაწესებულებიდან გლდანის ციხის საავადმყოფოში გადაიყვანეს. უფლებადამცველებმა, ოჯახის წევრებმა და ომბუდსმენმა ერთი საათის განმავლობაში არ იცოდნენ, სად იყო სააკაშვილი.

ნინო ლომჯარიას განცხადებით კი, სააკაშვილს ციხეში უთხრეს, რომ ის სამოქალაქო კლინიკაში უნდა გადაეყვანათ და შესაბამისად, ის აღნიშნულ შეთავაზებას დათანხმდა. მიუხედავად ამისა, სააკაშვილი მაინც ციხის საავადმყოფოში გადაიყვანეს, მოგვიანებით კი გაავრცელეს კადრები, რომლითაც სურთ დაამტკიცონ, რომ ექსპრეზიდენტს #12 დაწესებულება მისი ნების საწინააღმდეგოდ არ დაუტოვებია.

სააკაშვილი ამბობს, რომ #18 დაწესებულებაში გადასვლისას ციხის ერთ-ერთმა თანამშრომელმა უთხრა: "აჰა, ჩიტო, ხომ ჩაგიგდეთ ხელში", რის შემდეგაც მასზე ფიზიკურად იძალადეს.

იუსტიციის მინისტრი ამტკიცებს, რომ რუსთავის ციხიდან გლდანში გადაყვანისას არცერთი პროცედურა და ნორმა არ ყოფილა დარღვეული. მისივე მტკიცებით, სააკაშვილმა ციხეში შეყვანისას თანამშრომლებს სიტყვიერი და ფიზიკური შეურაცხყოფა მიაყენა, რაზეც გენერალურმა ინსპექციამ გამოძიება დაიწყო.