ჩანაწერების გავრცელებიდან დაახლოებით ერთი თვის შემდეგ, საპატრიარქომ გვაცნობა, რომ რამდენიმე მღვლდემთავარი პატრიარქს შეხვდა და ე.წ. კრებსებზე იმსჯელეს. შეხვედრის შემდეგ გავრცელებულ განცხადებაში ტრადიციულად აღნიშნულია, რომ "კრებსები" ეკლესიის დისკრედიტაციას ემსახურებოდა და ნაცვლად სავარაუდო უკანონო მოსმენებზე პასუხისმგებელი უწყებისა, ისინი ხელს ისევ მედიისკენ იშვერენ. საპატრიარქოში არ საუბრობენ არც იმ სავარაუდო დანაშაულებებზე, რომელთა შესახებ კრებსებში ვკითხულობთ და მხოლოდ "ზნეობრივ გადაცდომას" ახსენებენ.

განცხადებაში ხაზგასმულია, რომ გავრცელებული ფაილები საარჩევნო პროცესში ეკლესიის ჩართვას და შიდა დაპირისპირების გაღვივებას ემსახურებოდა. რაც შეეხება არგუმენტს, რომ არაერთმა ადამიანმა ფაილების ნაწილის ნამდვილობა დაადასტურა, საპატრიარქოში იმით ეხმაურებიან, რომ "ე.წ. კრებსები შეიცავს ზოგიერთ საჯაროდ გაცხადებულ ფაქტს, თუმცა მათში მაინც მრავალი მცდარი ინფორმაცია წერია".

მაშინ, როცა სავარაუდო დანაშაულებზე დუმილს ირჩევენ, ხაზს უსვამენ იმას, რომ ჩანაწერების ნაწილი ემთხვევა მათ მიმართ კრიტიკულად განწყობილი თეოლოგებისა და სასულიერო პირების განცხადებებს, რაც, მათი აზრით, "უკანასკნელ წლებში საპატრიარქოსა და ეკლესიის დისკრედიტაციას ემსახურებოდა". მათივე თქმით, ზოგიერთ შემთხვევაში ამ ჯგუფის წარმომადგენლები "ბოროტად სარგებლობდნენ მაღალი იერარქიის სახელით".

საპატრიარქოს ინფორმაციით, შეხვედრაზე აღინიშნა, რომ ზემოთაღნიშნული ჯგუფი კრიტიკულად განწყობილ ტელევიზიებთან შეთანხმებულად მოქმედებს.

"ტელევიზიები ამ ჯგუფის დახმარებით საეკლესიო საკითხების შესახებ ცილისმწამებლური შინაარსის სიუჟეტებს ამზადებდნენ და, ფაქტობრივად, მათი გეგმის განხორციელებაში იყვნენ ჩართულნი. სწორედ მათი ეთერით გახმოვანდა საპატრიარქოს შტურმისა და სინოდის წევრების დაპატიმრების გეგმის შესახებ. ამ ტელევიზიებს ყოველ შაბათსა და კვირას თავიანთ გადაცემებში იერიში აქვთ მიტანილი საპატრიარქოს წინააღმდეგ. ამისთვის კი საგულდაგულოდ იძიებდნენ და ჩხრეკდნენ მღვდელმთავრების პირად ცხოვრებას, რითაც ცდილობდნენ მოემწიფებინათ საზოგადოებრივი აზრი სასულიერო პირების გასასამართლებლად და დასასჯელად", — ამბობენ ისინი.

რაც შეეხება ფაილების შინაარსს, ისინი აცხადებენ, რომ იმ "საეჭვო" ჩანაწერებს, სადაც სასულიერო პირების "ზნეობრივ გადაცდომებზეა" საუბარი ყველა საშუალებით გადაამოწმებენ, თუმცა არ აკონკრეტებენ რას უწოდებენ "გადაცდომებს", როცა ფაილებში პედოფილიაზე, სავარაუდო სექსუალურ ძალადობაზე, იძულებაზე, რუსეთთან კავშირებზეა საუბარი.

განცხადების დასასრულს საპატრიარქო უკანონო მოსმენების მიუღებლობაზეც მიანიშნებს და ამბობს, რომ ისინი აუცილებლად ყურადღებით მიადევნებენ თვალს ამ საქმესთან დაკავშირებულ გამოძიებას, რომლის ფარგლებშიც ჯერჯერობით მხოლოდ მედიის წარმომადგენლები დაიკითხნენ.

საგულისხმოა, რომ მაშინ, როდესაც ეკლესიის საარჩევნო პროცესში ჩართვის მცდელობას საპატრიარქო "კრებსებს" აბრალებს, მათი საზოგადოებასთან ურთიერთობის სამსახურის ხელმძღვანელი ამბობს, რომ რიტორიკას და პათოსს დააკვირდებიან და შესაძლოა, მერე მრევლს უთხრან, "რა გააკეთოს არჩევნებზე".


13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. ოფიციალურად მათი ავთენდურობა დადასტურებული არ არის, თუმცა არაერთმა ადამიანმა ჩანაწერებში საკუთარი საუბრები ამოიცნო.

ატვირთულია Word-ის ასობით ფაილი, რომლებშიც ჩანს, რომ შესაბამისი სამსახურები სწავლობენ სასულიერო პირების (და არამარტო) კავშირებს, უსმენენ სატელეფონო საუბრებს, კითხულობენ მესიჯებს და აგროვებენ "კომპრომატებს" პირადი ცხოვრების შესახებაც.

ყველა ამ დოკუმენტში ჩამოთვლილია მაღალი იერარქიის სასულიერო პირები, რომლებსაც კონკრეტულ ადამიანებთან აქვთ "ინტიმური კავშირი". მითითებულია ამ მოქალაქეების სახელი, გვარი, პირადი ნომერი, ასევე, ფაილს დართული აქვს ფოტოები. სწორედ ამ მასალებში არის დასახელებული რამდენიმე სასულიერო პირი, რომლებსაც პედოფილიაში ედებათ ბრალი. მასალებში გვხვდება ინფორმაცია სავარაუდო სექსუალური ძალადობისა და იძულების ფაქტების შესახებაც.

გაიგეთ მეტი გავრცელებულ ჩანაწერებზე: