ე.წ. კრებსების გავრცელებიდან თითქმის ერთი თვის შემდეგ მაღალი იერარქიის სასულიერო პირები ილია მეორესთან შეიკრიბენ და "უკანასკნელ მოვლენებზე" იმსჯელეს. საპატრიარქოს განცხადებით, შეხვედრაზე "ერთმნიშვნელოვნად აღინიშნა", რომ ე.წ. კრებსების გავრცელების მიზანი იყო საარჩევნო პროცესში ეკლესიის ჩართვა, ისევე, როგორც მათი დისკრედიტაცია და შიდა დაპირისპირების გაღვივება.

"შეხვედრაზე ერთმნიშვნელოვნად აღინიშნა, რომ ბოლო დროს გავრცელებული ე.წ. კრებსების საკითხი საარჩევნო პროცესებში ეკლესიის ჩართვას, ეკლესიის დისკრედიტაციასა და შიდა დაპირისპირების გაღვივებას ემსახურებოდა. მიუხედავად იმისა, რომ ე.წ. კრებსები შეიცავს ზოგიერთ საჯაროდ გაცხადებულ ფაქტს, მათში მაინც მრავალი მცდარი ინფორმაცია წერია", — აცხადებს საპატრიარქო.

მათი ინფორმაციით, შეხვედრაზე აღინიშნა, რომ უკანონო მოსმენები ყოვლად მიუღებელია და ეკლესია აუცილებლად ყურადღებით მიადევნებს თვალს გამოძიებას. მათივე თქმით, "საეჭვო ჩანაწერებში" სასულიერო პირების "ზნეობრივ გადაცდომებს" ყველა საშუალებით გადაამოწმებენ. განცხადებაში არ არის საუბარი შეისწავლის თუ არა საპატრიარქო ჩანაწერების იმ ნაწილს, სადაც სავარაუდო დანაშაულზეა საუბარი, მათ შორის, სექსუალურ ძალადობასა და პედოფილიაზე.

განცხადებაში ვკითხულობთ იმასაც, რომ ზოგიერთი თელოგისა და სასულიერო პირისაგან შემდგარი ჯგუფის საჯარო განცხადებებსა და გავრცელებულ ფაილებს შორის ნაწილობრივ თანხვედრაა. საპატრიარქოს თქმით, ეს ჯგუფები გამოირჩევიან ეკლესიის დისკრედიტაციით და მათი წარმომადგენელი სასულიერო პირები ბოროტად სარგებლობენ მაღალი იერარქიის სახელით. ამ განცხადებით, საპატრიარქო მინიშნებებს აკეთებს მათ მიმართ კრიტიკულად განწყობილ პირებზე ისე, რომ არ ასახელებს, ვისზე საუბრობენ.

საპატრიარქო აცხადებს, რომ მადისკრედიტირებელი ჯგუფები და "ე.წ. კრიტიკულად განწყობილი ტელევიზიები" შეთანხმებულად მოქმედებენ.

"ტელევიზიები ამ ჯგუფის დახმარებით საეკლესიო საკითხების შესახებ ცილისმწამებლური შინაარსის სიუჟეტებს ამზადებდნენ და, ფაქტობრივად, მათი გეგმის განხორციელებაში იყვნენ ჩართულნი. სწორედ მათი ეთერით გახმოვანდა საპატრიარქოს შტურმისა და სინოდის წევრების დაპატიმრების გეგმის შესახებ. ამ ტელევიზიებს ყოველ შაბათსა და კვირას თავიანთ გადაცემებში იერიში აქვთ მიტანილი საპატრიარქოს წინააღმდეგ. ამისთვის კი საგულდაგულოდ იძიებდნენ და ჩხრეკდნენ მღვდელმთავრების პირად ცხოვრებას, რითაც ცდილობდნენ მოემწიფებინათ საზოგადოებრივი აზრი სასულიერო პირების გასასამართლებლად და დასასჯელად", — ვკითხულობთ განცხადებაში.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. ოფიციალურად მათი ავთენდურობა დადასტურებული არ არის, თუმცა არაერთმა ადამიანმა ჩანაწერებში საკუთარი საუბრები ამოიცნო.

ატვირთულია Word-ის ასობით ფაილი, რომლებშიც ჩანს, რომ შესაბამისი სამსახურები სწავლობენ სასულიერო პირების (და არამარტო) კავშირებს, უსმენენ სატელეფონო საუბრებს, კითხულობენ მესიჯებს და აგროვებენ "კომპრომატებს" პირადი ცხოვრების შესახებაც.

ყველა ამ დოკუმენტში ჩამოთვლილია მაღალი იერარქიის სასულიერო პირები, რომლებსაც კონკრეტულ ადამიანებთან აქვთ "ინტიმური კავშირი". მითითებულია ამ მოქალაქეების სახელი, გვარი, პირადი ნომერი, ასევე, ფაილს დართული აქვს ფოტოები. სწორედ ამ მასალებში არის დასახელებული რამდენიმე სასულიერო პირი, რომლებსაც პედოფილიაში ედებათ ბრალი. მასალებში გვხვდება ინფორმაცია სავარაუდო სექსუალური ძალადობისა და იძულების ფაქტების შესახებაც.

გაიგეთ მეტი გავრცელებულ ჩანაწერებზე:

• პედოფილია, პირადი ცხოვრების დეტალები და კავშირები რუსეთთან — რა წერია გავრცელებულ ფაილებში, ნაწილი I
• მიყურადება ელჩებზე, აქტივისტებზე, NGO-ებზე, სასულიერო პირებზე და პატრიარქის არჩევნების მოლოდინი — რა წერია ფაილებში, ნაწილი II
• პრეზიდენტი აპირებდა თავისი გამოსვლის ტექსტი პატრიარქისთვის შესასწორებლად გადაეგზავნა — გავრცელებული ჩანაწერები
• როგორ დაგეგმეს პატრიარქმა და მმკ-მ "ოჯახის სიწმინდის დღის" შექმნა — მასალები ჩანაწერებიდან
• გავრცელებული ფაილების მიხედვით, კალაძე მორგოშიას ორგანიზაციას ფინანსურ დახმარებას უწევს