ევროკავშირი საქართველოს სოფლის მეურნეობის განვითარებისთვის დამატებით გამოუყოფს 50 მილიონ ევროს. ხელშეკრულებას ხელი დღეს, 26 მაისს, 18:00 საათზე მოეწერება. ცერემონია ქორთიარდ მარიოტში გაიმართება.

სქართველოში ევროკავშირის წარმომადგენლობის ცნობით, დოკუმენტს ხელს მოაწერენ ევროკავშირის სამეზობლო პოლიტიკისა და გაფართოების საკითხების შესახებ მოლაპარაკებების გენერალური დირექტორატის ხელმძღვანელის მოადგილე კატერინა მატერნოვა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე.

დოკუმენტი ითვალისწინებს სოფლისა და სოფლის მეურნეობის განვითრების ევროპის სამეზობლო პროგრამის (ENPARD) მეორე ფაზის ფარგლებში საქართველოსთვის 50 მილიონი ევროს ოდენობის გამოყოფას. ხელმოწერის ცერემონიას დაესწრებიან ევროკავშირის ელჩი საქართველოში იანოშ ჰერმანი, ეკონომიკისა და მდგრადი განვითარების მინისტრი, ვიცე-პრემიერი დიმიტრი ქუმსიშვილი და სოფლის მეურნეობის მინისტრი ოთარ დანელია.

რას გულისხმობს ENPARD?

ევროკავშირის წარმომადგენლობის ცნობით, ENPARD-ის მეორე ფაზის მიზანს სურსათის უვნებლობისა და ხარისხის სტანდარტების, ასევე ინსპექტირებისა და კონტროლის მექანიზმების გაუმჯობესება წარმოადგენს. სოფლად სიღარიბის დაძლევისთვის, ENPARD-ის პროგრამა მთავრობას სოფლის განვითარების ეროვნული სტრატეგიის შემუშავებაში დაეხმარება. მასთან, ქალაქისა და სოფლის თანაბარი განვითარების ხელშეწყობის მიზნით, ENPARD-ი სოფლის ეკონომიკის დივერსიფიკაციის სამთავრობო პროგრამების ხელშეწყობას და აჭარასა და აფხაზეთში სოფლის განვითარების საპილოტე პროგრმების პირდაპირ დახმარებას უზრუნველყოფს.

"ENPARD-ის ახალი ფაზა წარსულ გამოცდილებას ეფუძნება. პირველი ფაზის ფარგლებში დაწყებული სამთავრობო სტრუქტურების რეფორმირება, მათი ინსტიტუციონალური გაძლიერება და მცირე ფერმერთა ქმედითუნარიანობის ამაღლება, მათი კოოპერაციის ხელშეწყობისა და ტექნიკური დახმარების გზით, ამჟამადაც ხორციელდება", - წერს გავრცელებულ განცხადებაში ევროკავშირის წარმომადგენლობა.

ევროკავშირის წარმომადგენლობის შეფასებით, ბოლო ორი წლის განმავლობაში, ENPARD-მა ხელშესახებ შედეგებს მიაღწია: ქვეყნის მასშტაბით დარეგისტრირებული 1 000-მდე სასოფლო-სამეურნეო კოოპერატივი ფერმერებს წარმოებისა და ტექნიკით სარგებლობის ხარჯებს მკვეთრად უმცირებს. გარდა ამისა, საქართველოს რეგიონებში დაფუძნებული 52 საინფორმაციო და საკონსულტაციო ცენტრი ფერმერებს სასოფლო-სამეურნეო ინფორმაციაზე წვდომასა და გადამზადების საშუალებას აძლევს პერსპექტვაში, სოფლის მეურნეობის სამინისტრო უფრო ეფექტიანი უწყება გახდება, რაც სექტორში უკეთესი პოლიტიკის გატარებას და ფერმერთა მეტად დახმარების შესაძლებლობას უზრუნველყოფს.