ათონელის რეზიდენციასთან მიმდინარე ე.წ. ზებრების აქციაზე, დემონსტრანტებს ავტომობილი განზრახ დაეჯახა. ამის შესახებ თავდაპირველად სოციალურ ქსელში OC Media-ს დირექტორმა და ფოტორეპორტიორმა, მარიამ ნიკურაძემ დაწერა. მისი ინფორმაციით, ერთ-ერთ დაშავებულს — მარიამ მეყანწიშვილს მეათე ნეკნის ხაზოვანი მოტეხილობა დაუდგინდა.

"ზებრების აქციაზე რამდენიმე ადამიანი გაიტანა მანქანამ ძალით. მარიამ მეყანწიშვილი გადაიყვანეს სასწრაფოში, მანამდე გონი დაკარგა ორჯერ. მეორე დაზარალებულიც, ლიზი უბილავაც, ამ წუთას წაიყვანა სასწრაფომ. პოლიციამ გვითხრა, რომ განზრახ დაჯახების ფაქტი "გადაცემულიაო" შესაბამის ადგილასო. გამოძიება დაიწყო თუ არა, არ ვიცით.

UPDATE: მარიამ მეყანწიშვილს მეათე ნეკნის ხაზოვანი მოტეხილობა დაუდგინდა, კიდევ დამატებით კვლევებს უტარებენ", — წერს მარიამ ნიკურაძე.

დაშავებული მარიამ მეყანწიშვილი წუხელვე მოინახულა ადვოკატმა, რომელმაც დაადასტურა, რომ მისი დაცვის ქვეშ მყოფს მეათე ნეკნის მოტეხილობა აქვს.

"მარიამი მოვინახულე. მის სიცოცხლეს და ჯანმრთელობას საფრთხე არ ემუქრება. მაგრამ გატეხილი აქვს ნეკნი და აუცილებელია, რომ დამატებითი კვლევები ჩაუტარდეს და მხოლოდ ამის შემდეგ გამოწერენ. მნიშვნელოვანი რა არის იცით? პოლიციის თანამშრომლები ამ დროის განმავლობაში არ მოსულან, რომ დაინტერესებულიყვნენ — როგორ არის და შემდეგ ის ადამიანი დააკავონ, ვინც მარიამზე განზრახ მოახდინა შეჯახება", — აცხადებს ადვოკატი.

NEWS.On.ge შსს-სთან ცდილობს დამატებითი დეტალების გარკვევას.