ათონელის რეზიდენციასთან მიმდინარე ე.წ. ზებრების აქციაზე ავტომობილის განზრახ დაჯახების შედეგად აქციის 2 მონაწილის დაშავების ფაქტზე საქმე 126-ე მუხლის 1-ელი პრიმა ნაწილის "გ" ქვეპუნქტით აღიძრა, რაც გულისხმობს ძალადობას 2 ან მეტი პირის მიმართ. ამის შესახებ NEWS.On.ge-ს შსს-ში უთხრეს. შემთხვევა წუხელ, გვიან ღამით მოხდა. გავრცელებულ ინფორმაციით დაშავებულები არიან აქტივისტები თამარ მეყანწიშვილი და ლიზა უბილავა. მარიამ მეყანწიშვილის

შს მინისტრის სანქცირებული მოადგილის, ალექსანდრე დარახველიძის თქმით, აღნიშნულ ფაქტთან დაკავშირებით გამოძიება დაწყებულია.

"შსს-ს ქალაქ თბილისის პოლიციის დეპარტამენტში აღნიშნულ ფაქტთან დაკავშირებით დაწყებულია გამოძიება სისხლის სამართლის კოდექსის 126-ე მუხლით. ტარდება შესაბამისი საგამოძიებო და საპროცესო მოქმედებები და უკვე ამ გამოძიებების შემდეგ ეტაპზე მოგაწვდით დეტალურ ინფორმაციას", — განაცხადა დარახველიძემ.

რაც შეეხება დაშავებულების მდგომარეობას, მარიამ მეყანწიშვილის ადვოკატის ინფორმაციით, აქტივისტს მეათე ნეკნის მოტეხილობა აქვს.

"ზებრების აქციაზე რამდენიმე ადამიანი გაიტანა მანქანამ ძალით. მარიამ მეყანწიშვილი გადაიყვანეს სასწრაფოში, მანამდე გონი დაკარგა ორჯერ. მეორე დაზარალებულიც, ლიზი უბილავაც, ამ წუთას წაიყვანა სასწრაფომ. პოლიციამ გვითხრა, რომ განზრახ დაჯახების ფაქტი "გადაცემულიაო" შესაბამის ადგილასო. გამოძიება დაიწყო თუ არა, არ ვიცით. UPDATE: მარიამ მეყანწიშვილს მეათე ნეკნის ხაზოვანი მოტეხილობა დაუდგინდა, კიდევ დამატებით კვლევებს უტარებენ", — წერს OC Media-ს დირექტორი და ფოტორეპორტიორი მარიამ ნიკურაძე.