სამოქალაქო საარჩევნო კომისიამ ბრიფინგზე საარჩევნო პროცესისას უბნებზე დაფიქსირებულ დარღვევებზე ისაუბრა. დღის განავლობაში მსგავსი ფაქტები მათ საიტზე, cec.org.ge-ზე განთავსდება, ღამით კი ისინი პარალელური დამოუკიდებელი დათვლის შედეგებს გამოაქვეყნებენ.

მათი ჩამოთვლილი დარღვევების ნაწილი დამკვირვებლებისთვის საქმიანობის შეზღუდვას ეხებოდა. გლდანში, დიდუბის 2 უბანსა და ჩხოროწყუს მე-16 უბანზე დაფიქსირდა, რომ დამკვირვებლებს რეგისტრატორებზე დაკვირვებისა და ფოტო/ვიდეო მასალის გადაღების საშუალება არ ეძლეოდათ. მაგალითად, კომისიის თქმით, რეგისტრატორების მაგიდები კედლებთანაა მიდგმული და ამიტომ დამკვირვებლები მათ უკან ვერ დგებიან.

სამოქალაქო საარჩევნო კომისიამ ისაუბრა იმაზეც, რომ საარჩევნო უბნებთან და ასევე, საარჩევნო ყუთის წამღები ორი კომისიის წევრისგანაც ხდებოდა პოლიტიკური აგიტაცია, როდესაც კონკრეტული პირები ამომრჩევლებზე ზეწოლას ახდენდნენ და ეუბნებოდნენ, ვისთვის მიეცათ ხმა. კომისია აცხადებს, რომ მსგავსი ქმედებები ხორციელდება საარჩევნო უბნებიდან 100-მეტრიან რადიუსში, რაც კანონით აკრძალულია. მათი თქმით, პოლიტიკური აგიტაციის მაგალითი დაფიქსირდა ბოლნისშიც, სადაც საარჩევნო უბნის შენობაში მოქალაქეებს ქართული ოცნების პლაკატები გახვდათ გაკრული.

ბრიფინგზე ისაუბრეს დარღვევებზე თავად კომისიის წევრების მხრიდანაც. მათი თქმით, დედოფლისწყაროს შემთხვევაზე, როდესაც ამომრჩევლები პროპორციულ და მაჟორიტარულ ბიულეტენებს სხვადასხვა კონვერტებში დებდნენ, კომისია ამაზე რეაგირებას არ ახდენდა. მათივე თქმით, დიდუბის მე-10 უბანზე კომისიის მდივანი საჩივრის რეგისტრაციაზე უარს აცხადებს.

კომისია შეეხო არაერთ გაფუჭებულ ან დაუმოწმებელ ბიულეტენსაც, როდესაც ამომრჩევლებს არასწორად მოხეულ ან ისეთ ბიულეტენებს აძლევდნენ, რომელსაც ბეჭედი არ აქვს დარტყმული. დაფიქსირდა მერისა და მაჟორიტარის ასარჩევად ერთნაირი ბიულეტენების დაბეჭვდის მაგალითი და მსგავსი ტიპის სხვა დარღვევები.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.

გაიგე მეტი: