პარლამენტის თავმჯდომარე კახა კუჭავა აღიარებს, რომ საარჩევნო უბანზე პარტიული სიმბოლიკით მისვლით კანონი დაარღვია. მისი თქმით, ეს შემთხვევითობა იყო.

"დილით რვა საათზე შევეცადე, ტრადიციულად, პირველი მივსულიყავი უბანზე, ნამდვილად არ მივაქციე ყურადღება, რომელი პირბადე გავიკეთე. დარღვევა იყო ეს, ეს ფაქტი არის და ვიცი, რომ შესაბამისი რეაგირება იქნება და როგორც ვატყობ, ჯარიმის გადახდაც მომიწევს", — განუცხადა მან ჟურნალისტებს.

პარლამენტის თავმჯდომარე, კახა კუჭავა საარჩევნო უბანზე პარტიული სიმბოლიკით — 41-ნომრიანი პირბადით მივიდა. გარდა ამისა, მან თქვა, რომ ხმა კახა კალაძესა და ქართულ ოცნებას მისცა. ორივე ეს ქმედება კანონდარღვევაა, კერძოდ, საარჩევნო კოდექსის 45-ე მუხლის 11-ე პუნქტის და 2 000-ლარიან სანქციას ითვალისწინებს.

საქართველოს ახალგაზრდა იურისტთა ასოციაციის სამართლებრივი დახმარების პროგრამის დირექტორი, ნონა ქურდოვანიძე On.ge-სთან აცხადებს, რომ კუჭავას მიერ საარჩევნო უბანზე პარტიული სიმბოლიკიანი პირბადით მისვლა ადმინისტრაციული სამართალდაღვევაა.

"როგორც მედიის გავრცელებულ კადრებში და ფოტომასალაში ჩანს, კახა კუჭავა იმყოფება ქართული ოცნების სიმბოლიკიანი ნიღბით, სადაც ჩანს ლოგო და პარტიის ნომერი, 41, რაც წარმოადგენს აგიტაციიას კენჭისყრის დღეს კენჭისყრის უბანზე. საარჩევნო კოდექსი ითვალისწინებს სანქციას, ეს წარმოადგენს საარჩევნო, ადმინისტრაციულ სამართალრღვევას და ისჯება 2000 ლარით. ჩვენ ვაპირებთ მივმართოთ საოლქო საარჩევნო კომისიას ამ ფაქტზე", — აცხადებს ქურდოვანიძე და ამატებს, რომ ვერ იხსენებს ფაქტს, როცა დეპუტატს ან პარლამენტის თავმჯდომარეს საარჩევნო უბანზე ნომრიანი ატრიბუტი ეტარებინოს.

დღეს, 2021 წლის 2 ოქტომბერს, საქართველოში ადგილობრივი თვითმმართველობის არჩევნები იმართება. მოსახლეობა აირჩევს 64 მერს და საკრებულოს 2044 დეპუტატს. ეს რიგით მერვე თვითმმართველობის არჩევნებია, რომელიც დამოუკიდებელ საქართველოში ტარდება, თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება აცხადებს, რომ ამ პირობის შესრულებას არ აპირებს.