საკონცენტრაციო ბანაკის ყოფილი მდივანი გასამართლებამდე ხანდაზმულთა სახლიდან გაიქცა

ნაცისტების საკონცენტრაციო ბანაკის კომენდანტის ყოფილი მდივანი, ირმგარდ ფურხნერი, ხანდაზმულთა სახლიდან მანამდე გაიქცა, სანამ იგი სასამართლოს წინაშე წარდგებოდა.

96 წლის ქალს, რომელმაც ნაცისტებისთვის მუშაობა 18 წლის ასაკში, პოლონეთში დაიწყო, ბანაკის ათასობით პატიმრის დახოცვაში თანამონაწილეობა ედება ბრალად. თუმცა, როგორც სასამართლოს წარმომადგენელი ფრედერიკე მილჰოფერი აცხადებს, ფურხნერის ადგილსამყოფელი უცნობია.

"ხანდაზმულთა სახლი დილაადრიან, ტაქსით დატოვა და მეტროსადგურის მიმართულებით წავიდა", — ამბობს მილჰოფერი.

ფურხნერს ბრალდებას სასამართლოზე მანამდე ვერ წაუყენებენ, სანამ იგი პროცესს არ დაესწრება. აღსანიშნავია, რომ პროცესი არასრულწლოვანთა სასამართლოში იმართება, რადგან დანაშაულის ჩადენისას მისი ასაკი შესაბამისი იყო.

სასამართლოზე ელოდებიან ჰოლოკოსტს გადარჩენილ რამდენიმე პატიმარსაც, რომლებიც მათი გამოცდილების შესახებ ჩვენებას მისცემენ.

ფურხნერს ბრალად ედება 11 412 მკვლელობისა და 18 მკვლელობის მცდელობის საქმეში თანამონაწილეობა. მისი ადვოკატი აცხადებს, რომ უცნობია, იცოდა თუ არა კომენდანტის მდივანმა, რა ემართებოდათ ბანაკის პატიმრებს. ასევე "კონკრეტული" მტკიცებულებები, რომ იგი მკვლელობებში მონაწილეობდა, მწირია.

ირმგარდ ფურხნერი შტუტჰოფის საკონცენტრაციო ბანაკში, 1944 წელს.

აღსანიშნავია, რომ საქმე ფურხნერის წინააღმდეგ საქმე მას შემდეგ აღიძრა, რაც 2011 წელს, ერთ-ერთი საკონცენტრაციო ბანაკის ყოფილი დარაჯის გასამართლებისას მოსამართლემ განაცხადა, რომ ჩადენილ დანაშაულებებზე ყველაა პასუხისმგებელი, მიუხედავად მათი დიდი თუ პატარა წვლილისა. ამ პრეცედენტის შემდეგ, წინა წლებში, სასამართლოს წინაშე ნაცისტური რეჟიმის საქმეებში მონაწილე არაერთი პირი წარდგა.

როგორც ექსპერტები აცხადებენ, დამნაშავეების გასამართლება ახლა უფრო სიმბოლურ ხასიათს ატარებს. ეს არის იმ სამართლებრივი ხარვეზის გამოსწორება, რომლის გამოც ნაცისტური რეჟიმის ხელშემწყობი ბევრი პირი არ გასამართლებულა. ამის გათვალისწინებით, ის პირები, რომელთაც ბრალი დღეს წარედგინებათ, მათი ასაკის გამო, ციხეში არ აღმოჩნდებიან.

ფურხნერის პროცესი კი რამდენიმე თვით გადაიდო. მანამდე, ბრანდენბურგის სასამართლოს წინაშე წარდგენა შტუტჰოფის საკონცენტრაციო ბანაკის ყოფილ დარაჯს მოუწევს, რომელიც ამჟამად 100 წლისაა.