პარტია დროას ლიდერი ელენე ხოშტარია აცხადებს, რომ კატასტროფაა, როცა ევროკავშირში საქართველოს ელჩს ბრიუსელში დამსახურებულად იბარებენ. მისი თქმით, ელჩების მოსმენა კონვენციის დარღვევაცაა და "მტრული სახელმწიფოს მიმართ ქმედების" ნიშნებია.

"კრიზისის დროს ხდება ხოლმე ელჩის დაბარება და არის კატასტროფა, რომ ჩვენ მივედით იმ მდგომარეობამდე, რომ ევროკავშირი იბარებს საქართველოს ელჩს, დამსახურებულად. გარდა იმისა, რომ ეს არის კონვენციის დარღვევა ცალსახად, რაც როგორც ჩანს კახი კალაძემ არ იცის, ეს არის მტრული სახელმწიფოების მიმართ ქმედება. გამოდის, რომ ევროკავშირი არის მტრული სახელმწიფო და არა მეგობრული", — თქვა ელენე ხოშტარიამ.

საქართველოს ელჩი ევროკავშირში, ვახტანგ მახარობლიშვილი გავრცელებულ ფაილებთან დაკავშირებით ბრიუსელში დაიბარეს. ევროკავშირის ელჩის, კარლ ჰარცელის განცხადებით, ისეთი პარტნიორი ქვეყნისგან როგორიც საქართველოა, მსგავსი ტიპის საქმიანობას მათ წინააღმდეგ ბუნებრივად არ მიაჩნიათ. მისივე თქმით, ამ საკითხს ძალიან სერიოზულად იღებენ, რადგან ეს აჩენს კითხვებს, ვენის კონვენციის დიპლომატიური ურთიერთობების თვალსაზრისით.

გერმანიის ელჩი ჰუბერტ ქნირში აცხადებს, რომ დიპლომატიური წარმომადგენლობების ფარული მოსმენა, იმ შემთხვევაშიც კი, როდესაც ეს მათზე არ არის მიმართული, "დიპლომატიური ურთიერთობების შესახებ ვენის კონვენციის დარღვევას წარმოადგენს".

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ჩანაწერების მიხედვით, უსმენენ და უთვალთვალებენ ელჩებსა და საელჩოების თანამშრომლებსაც. ფაილებში დაარქივებულია ევროკავშირის ელჩისა და მისი თანამშრომლის საუბარი. თავდაპირველად, ელჩი თანამშრომელს პროტოპრესვიტერ გიორგი ზვიადაძის ნომერს სთხოვს, შემდეგ კი მიმდინარე საკითხებზე თავის პოზიციას აფიქსირებს.

დოკუმენტებში არის ინფორმაცია ამერიკის საელჩოს წარმომადგენლების შესახებაც. მაგალითად, მითითებულია, რომ ელჩის თანაშემწეს დაუკავშირდა USAID-ის წარმომადგენელი და კონკრეტული შეხვედრის მონაწილეების შესახებ ინფორმაცია დააზუსტა.

მსგავსი ინფორმაციები გვხვდება გერმანიის, საფრანგეთის, ისრაელის და სხვა საელჩოების შემთხვევაშიც.

გაიგეთ მეტი გავრცელებულ ჩანაწერებზე: