გავრცელებული ჩანაწერების მიხედვით, საპატრიარქოს რუსეთის პრეზიდენტის, ვლადიმერ პუტინის კრიტიკა მიუღებლად მიაჩნდა და ასეთი შემთხვევის დაფიქსირებისას ერთგვარი სასჯელის ფორმასაც იყენებდა. როგორც ფაილებში ვკითხულობთ, 2019 წელს ერთ-ერთი პირს მღვდელმთავრებმა, შიო მუჯირმა და თეოდორე ჭუაძემ სტიქარის გახდა მოსთხოვეს იმის გამო, რომ ფეისბუქზე ოკუპანტი ქვეყნის პრეზიდენტისადმი კრიტიკული მიმართვა ჰქონდა.

ამის შესახებ წერია დოკუმენტში, რომელშიც სავარაუდოდ, სუს-ის თანამშრომლების მიმოწერააა ასახული. ამ ჩანაწერების ავთენტურობა დადგენილი არ არის, თუმცა რამდენიმე პოლიტიკოსმა, სასულიერო პირმა და ჟურნალისტმა საკუთარი საუბრის ჩანაწერები ამოიცნო.

[08.07.19, 16:25:01]: პატრიარქის დაცვის უფროს ვანო კობაიძეს ამავე სამსახურის თანამშრომელმა ნოდარ ლელუაშვილმა აცნობა, რომ საპატრიარქოში მისულია სამების საკათედრო ტაძრის - - (ვინაობა და პოზიცია დაშტრიხულია On.ge-ს რედაქციის მიერ). ამ უკანასკნელის განცხადებით, იგი საპატრიარქოში დაიბარეს ფეისბუქის პირად გვერდზე რუსეთის პრეზიდენტის მისამართით გაკეთებული კრიტიკული მიმართვის გამო, რისთვისაც შესაძლოა ჩამოერთვას სტიქარის ტარების უფლება.

ჩანაწერებში ვიგებთ იმასაც, რომ ამის შესახებ მან მეუფე იაკობს უთხრა. სავარაუდოდ, სუს-ის თანამშრომლები აღნიშნავენ, რომ ამ დროს იაკობი არაფხიზელ მდგომარეობაში იყო და სტიქარის ჩაცმის უფლება მისცა, თან აღნიშნა, რომ მუჯირი და ჭუაძე მას კითხვის დასმას ვერ გაუბედავდნენ.

[08.07.19, 19:28:10]: სამების საკათედრო ტაძრის სტიქაროსანმა - - ქორეპისკოპოს იაკობ იაკობიშვილთან დაიჩივლა, რომ ფეისბუქის პირად გვერდზე რუსეთის პრეზიდენტის მისამართით გაკეთებული კრიტიკული განცხადების გამო, მღვდელმთავრებმა შიო მუჯირმა და თეოდორე ჭუაძემ მოსთხოვეს სტიქარის გახდა.

აღნიშნულზე ი. იაკობიშვილმა (იმყოფება არაფხიზელ მდგომარეობაში) განაცხადა — "გავარტყი პუტინსაც და მაგათ ორივეს, მე გაძლევ კურთხევას სტიქარის ჩაცმაზე, ეგენი მე კითხვის დასმას ვერ გამიბედავენ".

ჩანაწერებით ირკვევა, რომ სტიქაროსანს ფეისბუქგვერდზე გამოქვეყნებული სტატუსების გამო პრობლემები ექმნებოდა სხვა მიმართულებითაც და ამ მიზეზით სამსახურიდან დაითხოვეს მისი ძმა.

02.07.20, 18:59:31: - - განმარტებით, მისი ძმა - -, რომელიც მუშაობდა თავდაცვის სამინსტროში, პატრიარქის თანაშემწის, არქიმანდრიტ დავით ჭინჭარაულის, ელიას მთაზე მდებარე წმინდა ელია წინასწარმეტყველის სახელობის ტაძრის წინამძღვრის, არქიმანდრიტ იონა მაისურაძის და თავად ა. [ანზორ] ჩუბინიძის თხოვნის მიუხედავად, თავდაცვის მინისტრმა ირაკლი ღარიბაშვილმა და მისმა მოადგილემ დავით სუჯაშვილმა მაინც გაანთავისუფლეს სამსახურიდან, იმ მიზეზით, რომ მან ფეისბუქზე გამოაქვეყნა ხელისუფლების საწინააღმდეგო სტატუსები.

- - ასევე განაცხადა, რომ ა. ჩუბინიძის თხოვნის გამო, თავს იკავებს აღნიშნული ფაქტის გასაჯაროვებისგან, თუმცა საჭიროების შემთხვევაში მზად არის ჟურნალისტებთან ისაუბროს დეტალურად და განაცხადოს, რომ მისი ძმა სამსახურიდან გაათავისუფლეს პოლიტიკური ნიშნით.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი გავრცელებულ ჩანაწერებზე: