პანდემიურ რეალობაში განსაკუთრებით აქტუალური დისტანციური, ან სახლიდან მუშაობის რეჟიმია. დაგვეთანხმებით, რომ ამ შემთხვევაში, განსაკუთრებით რთულია სამუშაო და დასვენების დროების გამიჯვნა და მათ შორის ბალანსის დაცვა.

მსოფლიო ჯანდაცვის ორგანიზაციის კვლევების მიხედვით, 55 საათზე მეტი მუშაობა კვირის განმავლობაში ზრდის ინსულტისა და გულის დაავადებების რისკს. მათ შორის, 2016 წელს აღრიცხულ გარდაცვალებათა 745,000 შემთხვევა ვორკაჰოლიზმს უკავშირდება.

იაპონიაში, სიკვდილის ეს ტიპი კაროშის სახელითაც კი არის ცნობილი და მას ყოველწლიურად ათასობით ადამიანი ეწირება.

მაშ ასე, ჩვენ გიყვებით რისკებზე, რომელიც გადამეტებულ მუშაობას თან სდევს:

1. იმატებს გულ-სისხლძარღვთა დაავადებების რისკი

კვლევების მიხედვით, ადამიანებს, რომლებიც კვირაში 55 საათს და მეტს მუშაობენ, 35-40 საათს მომუშავეებისგან განსხვავებით, 1.4%-ით მეტია ალბათობა, განუვითარდეთ არარეგულარული გულისცემა (წინა-გულოვანი ფიბრილაცია), რომელიც იწვევს სისხლის კოლტების დაგროვებას გულში. იმ შემთხვევაში, თუ არსებული კოლტები გულიდან გამოვა და ტვინის სისხლძარღვებში გაიჭედება, განვითარდება ინსულტი.

2. ქვეითდება ნივთიერებათა ცვლა

მიზეზ-შედეგობრივ გარემოებებს რომ მივყვეთ, ხანგრძლივი დროით მუშაობა გულისხმობს ჭარბი რაოდენობით ენერგეტიკული სასმელის, კოფეინის ან საკვების მიღებას. ამავდროულად, არღვევს თქვენი ფიზიკური აქტივობისა და ძილის ჰიგიენას, რაც, საბოლოოდ, ნივთიერებათა ცვლის დაქვეითებას იწვევს.

3. უარესდება მხედველობა

პანდემიის მიმდინარეობისას, ოფთალმოლოგები აღნიშნავენ მხედველობასთან დაკავშირებული პრობლემებით მომართვიანობის ზრდას, რაც გამოწვეულია ჭარბი გამოსხივებისგან მიღებული ჩივილებით და თვალის სიმშრალის სინდრომით. ამიტომ, კომპიუტერთან თუ სხვა გაჯეტთან მუშაობის დრო ლიმიტირებული და მოზომილი უნდა იყოს.

4. ირღვევა ძილის რეჟიმი

მუშაობისას ორგანიზმი, განსაკუთრებით კი ტვინი, აქტიურ მდგომარეობაშია, გაღიზიანებულია ნერვული სისტემა და სრულად არის ჩართული მიმდინარე პროცესებში.

სამწუხაროდ, დღის მანძილზე არსებული სტრესი ორგანიზმის მომატებული ძილიანობით ან სრული უძილობით გამოიხატება. მიჩნეულია, რომ ღამის ცვლაში მომუშავე ადამიანებში ძილის ჰიგიენა იმდენად დარღვეულია, რომ ცალკე დაავადებად ფორმირდა. სამსახურისგან არეული ძილის გრაფიკი შესაძლოა გახდეს ისეთი სერიოზული დაავადებების მიზეზი, როგორიცაა: დიაბეტი, გულისა და საჭმლის მომნელებელი სისტემების პათოლოგიები.

5. ჩნდება ფიზიკური პრობლემები

Occupational & Environmental Medicine journal-ის მიერ გამოქვეყნებული კვლევის მიხედვით, ხანგრძლივი სამუშაო საათების მქონე ადამიანებს უჩნდებათ ტკივილები სხვადასხვა ზონაზე, კერძოდ, ქალების შემთხვევაში — კისრის, მამაკაცების შემთხვევაში — წელის არეში. ეს დაჭიმულობა თუ ტკივილი ზედმეტი სტრესის მანიშნებელია.

6. ჩნდება მენტალური პრობლემები

გადამეტებული სტრესი, ნერვული დაძაბულობა, უძილობა, კოფეინზე დამოკიდებულება, არააქტიური რეჟიმი საბოლოოდ მენტალურ პრობლემებად კონვერტირდება. სამედიცინო პორტალ Healthline-ის მიხედვით, ვორკაჰოლიკები განიცდიან დეპრესიას, უჭირთ ურთიერთობა სხვებთან და საკუთარ თავთან.

7. თქვენი გულიც გადამეტებულად მუშაობს

დიახ, მაშინაც კი, თუ ვერ ამჩნევთ, მუშაობის სტრესისას ჰორმონი კორტიზოლი სინთეზირდება. ყოველდღიურად გადაჭარბებული მუშაობა ქმნის კორონალური დაავადებების, ინსულტის, მეორე ტიპის დიაბეტისა და სიმსივნის რისკებსაც კი.

ყველაფერი ზემოთ თქმული რომ შევაჯამოთ, ფაქტია, აუცილებელია შეიქმნათ დასვენებისა და მუშაობის ბალანსი ცხოვრებაში, მოიწესრიგოთ ძილის რეჟიმი, ისიამოვნოთ პატარა-დიდი მოვლენებითა და საგნებით, განიტვირთოთ და გაუფრთხილდეთ საკუთარ ჯანმრთელობას.

აქციეთ ჯანმრთელობაზე ზრუნვა ჩვევად!