მელ გიბსონის გახმაურებული ბლოკბასტერის, ქრისტეს ვნებანის, გაგრძელებაზე მუშაობა უკვე აქტიურ ფაზაში შედის. ცოტა ხნის წინ გახდა ცნობილი, რომ ფილმის გადაღებები რომში, ჩინეჩიტას კინოსტუდიაში, აგვისტოში დაიწყება. ამბავს სტუდიის ხელმძღვანელი მანუელა კაჩამანი იტალიურ გამოცემასთან ინტერვიუში ადასტურებს.

როგორც ცნობილია, ჩინეჩიტას კინოსტუდია, რომელიც ევროპაში უდიდესია, ფილმის წინამორბედის მსგავსად, გადაღებების მთავარი ლოკაცია იქნება. თუმცა, ამასთან, გადაღებები დაგეგმილია სამხრეთ იტალიის ანტიკურ ქალაქებში, მათ შორის, მატერაში, ჯინოზაში, გრავინა-ლატერცასა და ალტამურაში.

რამდენიმე კვირის წინ, მელ გიბსონმა ქრისტეს ვნებანის გაგრძელებასთან დაკავშირებული გეგმები გაამხილა. რეჟისორის თქმით, იესო ქრისტეს როლს კვლავ ჯიმ ქევიზელი შეასრულებს. თუმცა, რადგან ფილმის გამოსვლიდან უკვე 20 წელზე მეტია გასული, მსახიობის "გასაახალგაზრდავებლად" გიბსონი სხვადასხვა ტექნოლოგიის, მათ შორის, კომპიუტერული გრაფიკის გამოყენებასაც განიხილავს. კინოფილმების ინტერნეტბაზა IMDb-ის ინფორმაციით, პროექტში ჩართულები არიან მაია მორგენშტერნი და ფრანჩესკო დე ვიტოც, რომლებმაც ქრისტეს ვნებანში მარიამ ღვთისმშობელი და პეტრე მოციქული განასახიერეს.

• "სცენარში წარმოუდგენელი ამბები ხდება" — მელ გიბსონი ქრისტეს ვნებანის გაგრძელებაზე

რაც შეეხება შინაარსს: ფილმში, სახელწოდებით ქრისტეს აღდგომა, თხრობა კვლავ ბიბლიურ სიუჟეტს მიჰყვება, ამბავი კი, გიბსონის თქმით, "ანგელოზების დაცემიდან ქრისტეს უკანასკნელი მოციქულის სიკვდილამდე" იქნება მოთხრობილი. რეჟისორი ამატებს, რომ თავისი ჩანაფიქრი "საკმაოდ ამბიციურია" და ბოლომდე დარწმუნებულიც კი არაა, რომ მისი შესრულება გამოუვა.

• მელ გიბსონი ქრისტეს ვნებანის გაგრძელების გადასაღებად ადგილებს ეძებს

ბიბლიურ ისტორიაზე დაფუძნებული ქრისტეს ვნებანი, რომელიც ეკრანებზე 2004 წელს გამოვიდა, გახდა ყველა დროის ყველაზე მაღალშემოსავლიანი დამოუკიდებელი კინოპროექტი; $30-მილიონიანი ბიუჯეტის საპირწონედ, ფილმის შემოსავალმა $612 მილიონს გადააჭარბა.

ქრისტეს ვნებანისთვის, რომელიც იესო ქრისტეს ცხოვრების ბოლო საათებზე გვიყვება, სცენარი მელ გიბსონმა და ბენედიქტ ფიცჯერალდმა დაწერეს. აღსანიშნავია, რომ ნაწარმოებში დიალოგები მხოლოდ არამეულ, ებრაულ და ლათინურ ენებზეა, რეჟისორი კი ფილმის სხვა ენებზე გახმოვანების წინააღმდეგი იყო.

ქრისტეს ვნებანში სხვადასხვა ქვეყნის მსახიობები მონაწილეობდნენ. იესო ქრისტეს როლი ამერიკელმა ჯიმ ქევიზელმა ითამაშა, მარიამ ღვთისმშობელი რუმინელმა მაია მორგენშტერნმა განასახიერა, მარიამ მაგდალელი კი — იტალიელმა მონიკა ბელუჩიმ.

უჩვეულო კომერციული წარმატებისა და ოსკარის სამ ნომინაციაში წარდგენის მიუხედავად, ფილმმა მაყურებელი ორად გახლიჩა. მსახიობების შესრულებამ და რეჟისორის ნამუშევარმა მოწონება კი დაიმსახურა, მაგრამ ნაწილმა ფილმი ძალადობის დაუფარავი სცენებისთვის გააკრიტიკა; ზოგმაც, შინაარსის გამო, მელ გიბსონი ანტისემიტიზმში დაადანაშაულა.

ქრისტეს ვნებანის გაგრძელებაზე ხმები პირველად 2016 წელს გავრცელდა, როცა სცენარისტმა რენდალ უოლესმა განაცხადა, რომ მან და გიბსონმა პროექტზე მუშაობა დაიწყეს. 2018 წელს ჯიმ ქევიზელმა თქვა, რომ გიბსონმა მას სცენარის მესამე ვარიანტი გაუგზავნა.