"მე მინდა, ვწერო ისეთი მკითხველებისთვის, რომელთაც სასწაულების მოხდენა შეუძლიათ. სასწაულებს კი მხოლოდ ბავშვები ახდენენ მაშინ, როდესაც წიგნებს კითხულობენ", — ამბობდა მსოფლიოში ყველაზე ცნობილი საბავშვო მწერალი, ასტრიდ ლინდგრენი.

სწორედ სასწაულების ჩამდენი მკითხველი ბავშვებისთვის შეიქმნა ქინდერბუბუ — ინიციატივა, რომელმაც უკვე მსოფლიოს ათობით ქვეყანა მოიცვა და საგანმანათლებლო საქმიანობასთან ერთად ტურისტებისა და ინვესტიციების მოზიდვის დატვირთვაც შეიძინა.

ბავშვობა ადამიანის ჩვევების ჩამოყალიბების ყველაზე ადრეული პერიოდია — ეს ჩვევები მოიცავს ხელოვნებასთან ურთიერთობის უნარების განვითარებასა და შემოქმედებით გამოცდილებასთან ზიარებას. ადამიანები, რომლებიც ბავშვობაში კითხულობენ, ზრდასრულობაშიც აქტიურ მკითხველებად რჩებიან. სწორედ ამიტომ, ქინდერბუბუმ გადაწყვიტა, ბავშვებისათვის კითხვა უჩვეულო და საინტერესო გამოცდილებად ექცია.

"ყველას უყვარს, როდესაც საკუთარ თავს ხედავს ჟურნალში ან ეკრანზე, განსაკუთრებით კი ბავშვებს", — ამბობს ბრენდის მარკეტინგის მენეჯერი, ანი მამადაშვილი, — "წარმოიდგინეთ ზღაპარი, სადაც ბავშვი მთავარი პერსონაჟია, მისი სახელი და ფოტო კი წიგნში თემატურად გამოჩნდება".

სწორედ ასე — მომხმარებლის მონაწილეობით — იწყება ქინდერბუბუს პროდუქციის შექმნა. ვებგვერდზე თავად ირჩევთ სასურველ ზღაპარს, შემდეგ კი მისთვის წინასიტყვაობასა და მიძღვნას წერთ. ბოლოს, წიგნის მთავარი პერსონაჟის — ბავშვის — ფოტოსაც ირჩევთ და ასე ხდება იგი ისტორიის მოქმედი გმირი.

ფოტო: KinderBubu / Facebook

როგორც ბრენდი აცხადებს, მათი დაკვირვების შედეგად, აღმოჩნდა, რომ ასე "ბავშვი თავად მოგზაურობას ჯადოსნურ სამყაროში და ეს მასში იწვევს უაღრესად დადებით ემოციას", რაც, თავის მხრივ, წიგნის მიმართ ინტერესს ზრდის.

თუმცა, ეს ყველაფერი არ არის. აკი ვახსენეთ, პროექტმა ათობით ქვეყანა მოიცვაო; ბელარუსი, ჩეხეთი, ბულგარეთი, საფრანგეთი, იტალია, იაპონია, ნორვეგია, ბრაზილია, მექსიკა — ეს იმ სახელმწიფოების არასრული ჩამონათვალია, სადაც ქინდერბუბუს საერთაშორისო გუნდის წევრები საქმიანობენ.

პროექტის ფინანსური დირექტორის, ბესო შენგელიას თქმით, ისინი პროდუქციას "უკვე აგზავნიან უცხოეთში და აქვთ განვითარებადი გეგმა".

"ეს უნიკალური შესაძლებლობაა, რომ ფეხი შევდგათ მსოფლიოს მილიონობით ოჯახში", — დასძენს იგი.

ოჯახებში კი ქინდერბუბუს წიგნებს, საინტერესო ამბებთან ერთად, საქართველოში მოსაწვევი ბარათი და რუკა შეაქვთ. კვლევების მიხედვით, ოჯახები მოგზაურობისას ბავშვების სურვილებს ითვალისწინებენ, წიგნების გაცნობის შემდეგ კი, საქართველოს მონახულების სურვილი ალბათ ბევრ ბავშვს გაუჩნდება.

შესაბამისად, ბრენდის განცხადებით, ეს ყველაფერი საქართველოში მოზიდულ "ათობით მილიარდ დოლარში" ითარგმნება.

პროექტს ქართული ბიზნესსექტორისა და ახალგაზრდების მხარდაჭერის იმედი აქვს, რათა მიზნად დასახული შედეგები უფრო მასშტაბური გახდეს და მალე მიიღწეს.