ოპოზიციის ფოთის მერობის კანდიდატის, გიგი უგულავას განცხადებით, სიმართლე ის არის, ევროპული საბჭოს პრეზიდენტის, შარლ მიშელის შეთანხმებიდან გასვლის გამო, ევროკავშირი დახმარებაზე უარს გვეუბნება. ასე ეხმაურება ის პრემიერმინისტრს, ირაკლი ღარიბაშვილს, რომელმაც თქვა, რომ ევროკავშირის მაკროფინანსურ დახმარების მეორე ნაწილის აღებისგან თავის შეკავება გადაწყვიტეს.

"სიმართლე ისაა, რომ რეფორმებზე უარის თქმის და შარლ მიშელის შეთანხმებიდან გასვლის გამო, ევროკავშირი უარს გვეუბნება ამ ტრანშზე. პრეზიდენტმა მიშელმა საჯაროდ გააფრთხილა ღარიბაშვილი. ხოდა ეს მესიჯ-ბოქსი მოიგონეს — ვალებს ვისტუმრებთო. სინამდვილეში, მილიარდელი ოლიგარქის მთავრობამ დააგროვა კატასტროფულად მაღალი ვალი მშპ-თან მიმართებაში, რაც ჩვენი შვილების გადასახდელია გამოსავალი არის-ეს სარეველა უნდა ამოიძირკვოს 2 ოქტომბრის რეფერენდუმზე", — წერს ის საკუთარ Facebook-ზე.

ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს". ასე უპასუხა ირაკლი კობახიძემ პალიტრანიუსის ეთერში ჟურნალისტის შეკითხვას, მიდის ქართული ოცნება იმაზე, რომ საქართველო ევროკავშირის მხრიდან მაკროფინანსურ დახმარებას არ მიიღებს.

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".