საქსტატის ინფორმაციით, 2020 წელს საქართველოში 1 054 სასტუმროს და სასტუმროს ტიპის დაწესებულება ფუნქციონირებდა, რაც 2019 წლის შესაბამის მონაცემთან შედარებით 37,3%-ით ნაკლებია. ბუნებრივია, კლების მთავარი მიზეზი კორონავირუსით გამოწვეული პანდემია და ამის ფონზე მიღებული ეკონომიკური შეზღუდვები იყო.

კვლევა მოიცავს რეგისტრირებულ სუბიექტებს, რომლებიც სხვადასხვა ტიპის ორგანიზაციულ-სამართლებრივ ფორმას მიეკუთვნებიან — 2020 წელს ასეთი სულ 1 010 ეკონომიკური სუბიექტი იყო. მათი ძირითადი ნაწილი, 57,2% შეზღუდული პასუხისმგებლობის საზოგადოებას (შპს) წარმოადგენდა.

როგორც კვლევის ანგარიშშია ნათქვამი, 2020 წელს მოქმედ სასტუმროებსა და სასტუმროს ტიპის დაწესებულებებში ადგილების საერთო რაოდენობამ 57,9 ათასს მიაღწია, რაც 24,1%-ით ნაკლებია 2019 წლის შესაბამის მაჩვენებელზე. ნომრების საერთო რაოდენობა კი 23,4%-ით შემცირდა და 26,9 ათასი შეადგინა.

2020 წელს საქართველოს სასტუმროები და სასტუმროს ტიპის დაწესებულებები 1,34 მილიონ სტუმარს მოემსახურა, რაც 66,5%-ით ნაკლებია წინა წლის შესაბამის მაჩვენებელზე. სტუმრებს შორის ის ადამიანებიც აღირიცხებიან, რომლებიც გასულ წელს კოვიდ-სასტუმროებში იზოლაციისა და მკურნალობის მიზნით იმყოფებოდნენ.

სტუმართა 30,6%-ს უცხოელები წარმოადგენდნენ. მათგან 16% რუსეთის ფედერაციის მოქალაქე იყო, რაც 2019 წლის შესაბამის მაჩვენებელზე 87,6% ნაკლებია. ევროკავშირის ქვეყნებიდან შემოსულ სტუმართა უმეტესობას გერმანიის (უცხოელი სტუმრების 3,1%) მოქალაქეები შეადგენდნენ, ხოლო სხვა ქვეყნებიდან შემოსულ სტუმართა უდიდესი წილი უკრაინისა (უცხოელი სტუმრების 10,3%) და ისრაელის (უცხოელი სტუმრების 9,7%) მოქალაქეებს ეკავათ.

2020 წელს, 2019 წელთან შედარებით, სასტუმროებში დასაქმებულთა რაოდენობა, 40%-ით, 13 615 ადამიანამდე შემცირდა. დასაქმებულთა შორის, 54,8% ქალი იყო.

შეგახსენებთ, რომ კორონავირუსით გამოწვეულმა პანდემიამ ტურიზმის ინდუსტრია მნიშვნელოვნად დააზარალა. 2020 წელს უცხოური ვიზიტების რაოდენობა წლიურად 80%-ით შემცირდა და 1,5 მილიონი შეადგინა. შესაბამისად, შემცირდა ტურიზმიდან შემოსული თანხებიც — ეროვნული ბანკის გათვლებით, გასულ წელს ტურიზმის სექტორმა უცხოელი ვიზიტორებისგან 541,7 მილიონი დოლარის შემოსავალი მიიღო, რაც 2019 წლის მონაცემთან შედარებით 2,7 მილიარდი დოლარით ნაკლებია.