"ასეთი სასტიკი ძალადობის ავტორები გამოუშვა გარეთ, იმიტომ რომ ღარიბაშვილი თავად არის მოძალადე" — ასე ეხმაურება ტელეწამყვანი ინგა გრიგოლია ვახო სანაიაზე თავდამსხმელების გათავისუფლების საკითხს. გრიგოლიას თქმით, ეს გადაწყვეტილება ცხადყოფს, რომ ჟურნალისტებს წინ ბევრი 5 ივლისი გველოდება.

"ეს არის ხელისუფლების მთავარი გზავნილი. დღეს ხელისუფლებამ კიდევ ერთხელ უთხრა მოძალადეებს, სადაც დაინახავთ ჟურნალისტებს, ვინც გვაკრიტიკებს, დაესხით თავს, მოკალი ცემაში, პატარა შვილის თვალწინ შეგიძლიათ გაუსწორდეთ ან შეგიძლიათ ცემით სიკვდილამდე მიიყვანოთ, მაგრამ თქვენი თავისუფლება არის გარანტირებული და, აი, დღევანდელმა მართლა დამონებულმა სასამართლომ ეს ყველაფერი ცხადყო.

სპეციალურად მიუსაჯეს ექვსი თვე, იმიტომ რომ უკვე გაათავისუფლონ, იმიტომ რომ წინ არის არჩევნები, იმიტომ რომ ჩვენ გვყავს მოძალადე ხელისუფლება, რომელმაც დღეს კიდევ ერთხელ დაამტკიცა ეს, როცა ასეთი სასტიკი ძალადობის ავტორები გამოუშვა გარეთ და გამოუშვა გარეთ იმიტომ რომ ღარიბაშვილი თავად არის მოძალადე, ღარიბაშვილი თავად დგას მოძალადეებზე და ახლა ამ არჩევნებზე მხოლოდ ამ მოძალადეების იმედი აქვს მას", — განაცხადა მან.

დღეს, 25 აგვისტოს ჟურნალისტ ვახო სანაიაზე თავდამსხმელებს მოსამართლე გიორგი კერატიშვილმა 150-საათიანი საზოგადოებისთვის სასარგებლო შრომა და 6-თვიანი პატიმრობა მიუსაჯა. ისინი სანაიას თავს 25 თებერვალს დაესხნენ და სამივე მათგან იმ დღესვე დააკავეს. სწორედ დღეს, 25 აგვისტოს, გავიდა 6 თვე მათი დაპატიმრებიდან, შესაბამისად, დღესვე გამოვლენ ციხიდან.

აღსანიშნავია, რომ საქმეზე ბოლო სასამართლო პროცესი 13 აგვისტოს ჩატარდა, თუმცა, მოსამართლემ განაჩენის გამოტანა 25 აგვისტომდე გადადო. სანაია მაშინ ამბობდა, რომ ყველა არგუმენტი და მტკიცებულება "დევს ხელის გულზე" იყო და განაჩენის გამოცხადების გადადების საფუძველი არ არსებობდა.

ვახო სანაიას თავს 25 თებერვალს დაესხნენ. მას ტვინის შერყევა დაუდასტურდა. ჟურნალისტი ამბობს, რომ მის მიმართ გამოხატული აგრესიის მიზეზი ჟურნალისტური საქმიანობა იყო.

გაიგე მეტი: