ჟურნალისტ ინგა გრიგოლიას განცხადებით, თუ ვახო სანაიაზე თავდამსხმელებს გამოუშვებენ, ეს ახალი 5 ივლისის დაანონსება იქნება. ამის შესახებ მან ისაუბრა საქალაქო სასამართლოსთან, სადაც დღეს ვახო სანაიას საქმეზე პროცესი მიმდინარეობს.

"დღეს არის ძალიან მნიშვნელოვანი დღე. ჩემი მოლოდინია, რომ ამ ხელისუფლებიდან ყველაფერს უნდა ველოდოთ, მარიანა ჩოლოიანი გამოუშვეს სულ ცოტა ხნის წინ, შემთხვევით გაიგო მედიამ და რატომ უნდა გამიკვირდეს, რომ დღეს ვახო სანაიაზე თავდამსხმელები გამოუშვან. მგონია, რომ არ არის გამორიცხული გამოუშვან [...] ჩვენ ვახოს საქმეზე ყველამ უნდა ვიბრძოლოთ ბოლომდე. ხვალ იქნება ბევრი ვახო სანაია, ბევრი ნაცემი ჟურნალისტი, თუ დღეს ჩვენ გავიგებთ რომ ეს მოძალადეები გამოუშვეს", — განაცხადა მან.

დღეს, ჟურნალისტ ვახო სანაიაზე თავდასხმის საქმეზე სასამართლო პროცესი მიმდინარეობს. ის აღნიშნავს, რომ სწორედ ასეთმა ფაქტებმა მიიყვანა ქვეყანა 5 ივლისამდე, წაახალისა ჟურნალისტებსა და სამოქალაქო აქტივისტებზე ძალადობა.

ვახო სანაიას თავს 25 თებერვალს დაესხნენ. მას ტვინის შერყევა დაუდასტურდა. ჟურნალისტი ამბობს, რომ მის მიმართ გამოხატული აგრესიის მიზეზი ჟურნალისტური საქმიანობა იყო.