ჟურნალისტ ვახო სანაიაზე თავდასხმის საქმეზე მოსამართლე გიორგი კერატიშვილმა განაჩენის გამოტანა 25 აგვისტოსთვის გადადო. დღეს პროცესი თბილისის საქალაქო სასამართლოში ნახევარ საათს გაგრძელდა. ვახო სანაიას თქმით, მოსამართლეს შეეძლო განაჩენი დღესვე გამოეცხადებინა, თუმცა ასე განზრახ არ მოიქცა.

"მე მტკიცებულებებით დავადასტურე, თუ რა მოხდა იქ 25 თებერვალს. მოსამართლემ გადადო სასამართლო საბოლოო გადაწყვეტილებისთვის 25 აგვისტოს. ცოტა გაუგებარია ჩემთვის, უფრო სწორად, ახსნას დაახლოებით ვუძებნი — ის ცდილობს, რომ ამ აგვისტოს დღეებში კიდევ გადაწიოს პროცესი. ივლისშიც ასე მოიქცა. როდესაც 5 ივლისი მოხდა და ეს ფონი იყო, არ მიიღო გადაწყვეტილება, გადმოიტანა აგვისტოში. ნახევარი საათი მიმდინარეობა სულ რაღაც პროცესი და მას დღესვე შეეძლო ამის გაკეთება. დარწმუნებული ვარ, იცის უკვე რა გადაწყვეტილებაც უნდა მიიღოს. დაველოდოთ 25 აგვისტოს", — ამბობს ვახო სანაია.

სანაია ფიქრობს, რომ წარმოუდგენელია, ამდენი პროცესის და ყველა მტკიცებულების წარდგენის შემდეგ, მოსამართლემ არ იცოდეს, რა გადაწყვეტილება უნდა მიიღოს, თუმცა ის ხელისუფლებისგან, განსაკუთრებით კი, 5 ივლისის შემდეგ, როდესაც ჟურნალისტებს მოსაკლავად დასდევდნენ, არაფერს გამორიცხავს:

"მოსამართლემ თქვა, რომ 25- ში იქნება სასამართლო პროცესი და ერთ წამში გავიდა პროცესიდან. არაფერი სხვა არ უთქვამს... ყველაფერი დევს ხელის გულზე, ასე რომ ველოდებით გამამტყუნებელ განაჩენს. სხვა განაჩენი აქ არ შეიძლება იყოს", — აცხადებს სანაია.

ვახო სანაიას თავს 25 თებერვალს დაესხნენ. მას ტვინის შერყევა დაუდასტურდა. ჟურნალისტი ამბობს, რომ მის მიმართ გამოხატული აგრესიის მიზეზი ჟურნალისტური საქმიანობა იყო.