ნატოს საგარეო საქმეთა მინისტრებმა ავღანეთის საკითხზე განცხადება გაავრცელეს, რომელშიც წერენ, რომ შეშფოთებულები არიან მიმდინარე მოვლენების გამო და მოუწოდებენ ძალადობის დაუყოვნებლივ შეწყვეტისკენ. მინისტრები აღნიშნავენ, რომ შემაშფოთებელია ცნობები ავღანეთში ადამიანის უფლებათა სერიოზული დარღვევების შესახებ და მოუწოდებენ, რომ დაცული იყოს საერთაშორისო ნორმები და სტანდარტები ყველა გარემოებაში.

"ახლა ჩვენი უშუალო ამოცანაა შევასრულოთ ჩვენი ვალდებულებები, გავაგრძელოთ ჩვენი მოქალაქეების, პარტნიორი ქვეყნების მოქალაქეების და ავღანელების უსაფრთხო ევაკუაცია, მათ შორის, მათი ვინც გვეხმარებოდა. ჩვენ მოვუწოდებთ ავღანეთში უფლებამოსილ პირებს პატივი სცენ და ხელი შეუწყონ მათ უსაფრთხო და მოწესრიგებულ გამგზავრებას, მათ შორის, ქაბულში, ჰამიდ კარზაის საერთაშორისო აეროპორტის გავლით. სანამ ევაკუაციის ოპერაციები გაგრძელდება, ჩვენ შევინარჩუნებთ მჭიდრო ოპერატიულ კოორდინაციას მოკავშირეთა სამხედრო საშუალებებით", — ვკითხულობთ განცხადებაში.

მინისტრები ამბობენ, რომ ავღანელი ხალხი იმსახურებს იცხოვროს უსაფრთხოდ და ღირსეულად და გააგრძელოს იმ მნიშვნელოვანი პოლიტიკური, ეკონომიკური და სოციალურ მიღწევების მშენებლობა, რომელსაც ბოლო ოცი წლის განმავლობაში მიაღწიეს. მათივე თქმით, გვერდით უდგანან სამოქალაქო საზოგადოებას, რომელსაც უნდა ჰქონდეს შესაძლებლობა, უსაფრთხოდ შეასრულოს მნიშვნელოვანი როლი ავღანურ საზოგადოებაში.

"ჩვენ მოვუწოდებთ ავღანეთის ყველა მხარეს კეთილსინდისიერად იმუშაონ ინკლუზიური და წარმომადგენლობითი მთავრობის შესაქმნელად, მათ შორის ქალებისა და უმცირესობების ჯგუფების მნიშვნელოვანი მონაწილეობით", — აცხადებენ ისინი.

მინისტრები განმარტავენ, რომ დღევანდელ ვითარებაში სრულად შეწყვიტეს ავღანეთის ხელისუფლების დახმარება და ხაზს უსვამენ, რომ ნებისმიერმა მომავალმა მთავრობამ ავღანეთში უნდა შეასრულოს საერთაშორისო ვალდებულებები — კანონის უზენაესობის დაცვა, ქალების, ბავშვებისა და უმცირესობების უფლებების დაცვა, ჰუმანიტარული დახმარების შეუფერხებლობის უზრუნველყოფა და ის, რომ ავღანეთი ვერადროს იქცეს ტერორიზმის სამიზნედ.

ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

გაიგეთ მეტი:

• რა მოხდა ქაბულში
• 20-წლიანი ომი ავღანეთში — რას (ვერ) მიაღწია ამერიკამ?