აშშ-ს ყოფილი პრეზიდენტი ჯორჯ ბუში და პირველი ლედი ლორა ბუში აცხადებენ, რომ ავღანეთში განვითარებული მოვლენების გამო მათი გულები დამძიმებულია, როგორც ადგილობრივების გამო, რომელიც ძალიან დაზარალდნენ, ასევე ამერიკელებისა და NATO-ს პატრნიორების გამო, რომლებმაც ამ საქმეს ბევრი რამ შესწირეს. ისინი მადლობას უხდიან თავდადებისთვის ყველას, ვინც წვლილი შეიტანა ამ ბრძოლაში.

"პრეზიდენტმა ბაიდენმა პირობა დადო, რომ მოხდებოდა ავღანელების ევაკუაცია, ამერიკის მოქალაქეებსა და ჩვენს მოკავშირეებთან ერთად. შეერთებული შტატების მთავრობას აქვს ლეგალური უფლება, ჰუმანიტარული კრიზისისას მიგრანტებს მიღება გაუმარტივონ. და ჩვენ გვაქვს რესურსი, რომ ისინი უსაფრთხო გასასვლელებით უზრუნველყოთ. ჩვენი ყველაზე მყარი პარტნიორები არასამთავრობო ორგანიზაციებთან ერთად მზად არიან, რომ დაგვეხმარონ.

მე და ლორა დარწმუნებულნი ვართ, რომ ევაკუაცია ეფექტური იქნება, რადგან მათ ახორციელებენ შეერთებული შტატების შეიარაღებული ძალების, დიპლომატიური კორპუსის და სადაზვერვო სამსახურის შესანიშნავი კაცები და ქალები", — ნათქვამია ბუშის განცხადებაში.

სწორედ ჯორჯ ბუშის პრეზიდენტობის დროს გაგზავნეს ავღანეთში ამერიკული ჯარები. ოპერაცია Enduring Freedom 2001 წლის 7 ოქტომბერს დაიწყო, როდესაც აშშ-სა და დიდი ბრიტანეთის ძალებმა დაიწყეს ავღანეთში ალ-ქაიდასა და თალიბანის სამიზნეებზე თავდასხმა. ეს გამოიწვია 2001 წლის 11 სექტემბრის ტრაგედიამ. მიუხედავად იმისა, რომ 2001 წელს თალიბანის რეჟიმი სწრაფად დაეცა, ომი გაგრძელდა მომდევნო 20 წლის განმავლობაში და გახდა ყველაზე გრძელი ომი აშშ-ს ისტორიაში.

თალიბანმა ავღანეთის დედაქალაქი ქაბულიც აიღო და განაცხადა, რომ "ომი დასრულდა". გუშინ, 15 აგვისტოს, მას შემდეგ, რაც თალიბანი დედაქალაქს მიადგა, ქვეყანა პრეზიდენტმა და მთავრობის რამდენიმე წევრმა დატოვა. მებრძოლები პრეზიდენტის სასახლეში შევიდნენ და ახლა ადმინისტრაციას ისინი აკონტროლებენ.

თავდაპირველად თალიბები ამბობდნენ, რომ ქალაქის ბრძოლით აღება და სისხლისღვრა არ სურთ, მხოლოდ შესასვლელთან გამაგრდებიან და ხელისუფლების მშვიდობიანად გადაბარებისთვის მოემზადებიან, თუმცა მოგვიანებით რამდენიმე დასახლებაში შევიდნენ — ქალაქში ისმოდა სროლის ხმა, არიან დაშავებულები. თალიბების მტკიცებით, ეს იმიტომ გააკეთეს, რომ პოლიციამ და მთავრობამ ქალაქი დატოვა და "წესრიგის უზრუნველყოფა" იყო საჭირო.

პრობლემურ საკითხად იქცა დიპლომატიური კორპუსის წარმომადგენლებისა და უცხო ქვეყნის მოქალაქეების უსაფრთხოდ გაყვანა. აშშ-მ საელჩოს თანამშრომლების ევაკუაცია თალიბების მისვლისთანავე დაიწყო. ისინი ვერტმფრენით გადაიყვანეს ქაბულის აეროპორტში. ამავე აეროპორტიდან ახორციელებდნენ ევაკუაციას სხვა ქვეყნებიც. რამდენიმე საათში აეროპორტს ათასობით ადამიანი მიადგა, რომელსაც ავღანეთიდან გაქცევა სურდა — ისინი თვითმფრინავში შეჭრას ცდილობდნენ.

ქვეყნების უმრავლესობამ ქაბულში საელჩოები დახურა და დიპლომატიური კორპუსის გაყვანას ცდილობს. გამონაკლისი რუსეთი, ჩინეთი და ირანია, რომლებიც ამბობენ, რომ მუშაობას აგრძელებენ.

ქაბულში დილა თალიბანის მმართველობის ქვეშ გათენდა. ქუჩებს შეიარაღებული დაჯგუფებები აკონტროლებენ.