დიდი ბრიტანეთი ავღანეთიდან მოქალაქეების ევაკუაციისთვის 600 ჯარისკაცს გზავნის. ეს გადაწყვეტილება გაერთიანებულმა სამეფომ თალიბანის მიერ ავღანეთის რამდენიმე დიდი ქალაქის აღების შემდეგ მიიღო. ჯარისკაცები ავღანეთში მყოფ ინგლისის მოსახლეობას, დიპლომატიურ პერსონალსა და თარჯიმნებს დაიცავენ და მათ შედარებით უსაფრთხო ადგილას გადაყვანას უზრუნველყოფენ.

წინა კვირაში საგარეო საქმეთა სამინისტრომ ავღანეთში მცხოვრებ ბრიტანელებს ქვეყნის დატოვებისკენ მოუწოდა. ამ დროისთვის იქ ინგლისის 4 000-მდე მოქალაქე იმყოფება.

თავდაცვის მდივნის, ბენ უოლესის თქმით, ბრიტანეთის მოქალაქეების, ავღანეთის სამხედრო და ყოფილი დოპლომატიური პერსონალის უსაფრთხოება მთავრობის უპირველესი პრიორიტეტია და ყველაფერს გააკეთებენ იმისთვის, რომ მათი უსაფრთხოება იყოს უზრუნველყოფილი.

თავდაცვის სამინისტროს განცხადებით, დიდი ბრიტანეთის ელჩი ავღანეთში მოქალაქეებთან ერთად ითანამშრომლებს გაერთიანებული სამეფოს ავღანეთის გადაადგილებისა და დახმარების ასოციაციასთან (ARAP), რომელიც უკვე 3 100-ზე მეტ ადამიანსა და მათ ოჯახებს დაეხმარა ინგლისში დაბრუნებაში.

13 აგვისტოს თალიბანმა ავღანეთის სიდიდით მეორე ქალაქი, ყანდაარი აიღო. მედიების განცხადებით, მისი აღება თალიბანისთვის, ჯერჯერობით, ყველაზე მნიშვნელოვანი მოგებაა. ასევე, 12 აგვისტოს თალიბანმა აიღო ქვეყნის სიდიდით მესამე ქალაქი — ჰერათიც, რის შემდეგაც აშშ-მ მოუწოდა ამერიკელებს, დაუყოვნებლივ დატოვონ ავღანეთი და დასახმარებლად 3 000 სამხედროს გაგზავნა, რათა უზრუნველყონ საელჩოს თანამშრომელთა უსაფრთხო დაბრუნება.

ავღანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება. აშშ-მ მთავარი სტრატეგიული წერტილი — ბაგრამის ავიაბაზა, უკვე დატოვა. ავღანეთში ამერიკელ სამხედროთა მხოლოდ მცირე ჯგუფი რჩება და ისინი საელჩოს დაიცავენ. ივნისის ბოლოს The Wall Street Journal-მა აშშ-ის დაზვერვის სამსახურთან დაახლოებული პირების ინფორმაციაზე დაყრდნობით გაავრცელა, რომ დაზვერვის სამსახურის დასკვნით, რომელიც ჯერ ოფიციალურად არ გამოქვეყნებულა, აშშ-ის ძალების მიერ ავღანეთის დატოვებიდან 6 თვეში შესაძლოა, ქაბულის მთავრობა დაეცეს.

გაიგეთ მეტი: