სოციალური სამართლიანობის ცენტრი ხელისუფლებას მოუწოდებს პრიორიტეტად დაისახოს გამყოფი ხაზის მიმდებარედ მცხოვრები მოსახლეობის უსაფრთხოების დაცვა და მათი სოციალურ-ეკონომიკური მხარდაჭერა.

"გამყოფი ხაზის გარშემო სოფლების (მთლიანობაში 116 სოფელი, რომელიც გორის, კასპის, ქარელის, ხაშურის, დუშეთის, ონის, საჩხერის, წალენჯიხისა და ზუგდიდის მუნიციპალიტეტებში სხვადასხვა სოფელს მოიცავს) მდგომარეობის ანალიზი აჩვენებს, რომ ომით დაზარალებული მოსახლეობის ნაწილი უსაფრთხოების მნიშვნელოვანი გამოწვევების წინაშე დგას, მათ დიდ ნაწილს კი შეზღუდული აქვს წვდომა სასიცოცხლო რესურსებსა და საბაზისო სოციალურ ინფრასტრუქტურაზე, მაგალითად როგორიცაა, სასმელი წყალი, სარწყავი წყალი, საძოვრები, ამბულატორიები, საბავშვო ბაღები", — ვკითხულობთ სოციალური სამართლიანობის ცენტრის განცხადებაში.

ორგანიზაციის ინფორმაციით, გამყოფი ხაზის მიმდებარე სოფლების ნაწილში პოლიციის პოსტი განთავსებული არ არის და ადგილობრივები უსაფრთხოების მუდმივი რისკის წინაშე დგანან.

სოციალური სამართლიანობის ცენტრში აღნიშნავენ, რომ სახელმწიფოს არ გააჩნია სოფლის მეურნეობის მხარდამჭერი პროგრამები იმ სოფლებისთვის, რომელთა ნაწილი უკანონო ბორდერიზაციის შედეგად საოკუპაციო ხაზს მიღმა აღმოჩნდა, შედეგად კი მოსახლეობამ საძოვრების, ბაღების რესურსის ნაწილი დაკარგა.

სოციალური სამართლიანობის ცენტრში ხაზს უსვამენ საცხოვრებელი სახლების რეაბილიტაციის საჭიროებას და აცხადებენ, რომ ომიდან 13 წლის შემდეგაც მოსახლეობას ომის ნანგრევებში უწევს ცხოვრება.

ორგანიზაციაში საუბრობენ კონფლიქტით დაზარალებულ რეგიონებში მიგრაციის მაღალ მაჩვენებელზე და სახელმწიფოს ახალგაზრდული პოლიტიკის არარსებობის გამო მათი დიდი ნაწილი სოფლებს ტოვებს.

"ჩვენს სრულად ვიზიარებთ, რომ ამ მხარდაჭერასა და ინტერვენციებს დიდი ოდენობით ფინანსური რესურსების მობილიზება სჭირდება, თუმცა მაინც ბუნდოვანია, ომიდან 13 წლის თავზეც რატომ გამოიყურება ეს სოფლები ასე ჩამორჩენილად, ღარიბად და მიტოვებულად. ამ მდგომარეობაზე ადგილობრივი მოსახლეობა ჩვენთან გულისტკივილით უთითებს, რომ მათ რჩებათ განცდა, რომ ამ სოფლების გამაგრების ინტერესი ხელისუფლებას არ აქვს", — აცხადებენ სოციალური სამართლიანობის ცენტრში.

სოციალური სამართლიანობის ცენტრი მთავრობას მოუწოდებს დამატებითი და საგანგებო ძალიხმევა გაწიოს გამყოფი ხაზის გარშემო სოფლებში მცხოვრები ომით დაზარალებული მოსახლეობის სოციალური და ეკონომიკური მხარდაჭერისთვის. ასევე, გადახედოს ამ სოფლებში უსაფრთხოების გეგმებს და პოლიციის პუნქტების გამართვისა და პატრულირების.

2008 წლის ომის დაწყებიდან 13 წელი გავიდა, თუმცა რუსეთი დღემდე არღვევს სუვერენული სახელმწიფოს საზღვრებს, იტაცებს ხალხს და ცივი ომის პირობებში აცხოვრებს საქართველოს.

2021 წლის 21 იანვარს ადამიანის უფლებათა ევროპული სასამართლომ საქართველოს ყველა ძირითადი სარჩელი დააკმაყოფილა. კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა. ასევე, სასამართლოს დიდმა პალატამ, კონვენციის მე-4 მუხლის შესაბამისად, რაც სიცოცხლის უფლებას გულისხმობს, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

აგვისტოს ომმა 400-ზე მეტი ადამიანის სიცოცხლე იმსხვერპლა, მათ შორი 170 სამხედრო მოსამსახურე იყო. ჯანდაცვის სამინისტროს მონაცემებით, ომში დაიჭრა/დაშავდა 2 232 პირი, მათგან 1 045 სამხედრო მოსამსახურე.