ტელეკომპანია იმედის მესაკუთრე შეიცვალა — პატარკაციშვილის ოჯახმა საკუთრების უფლება ჰანიველ პარტნერზის (Hunnewell Partners), რომლის ერთ-ერთი დამფუძნებელი ირაკლი რუხაძეა, კონტროლირებად კომპანიას გადასცა. ამის შესახებ განცხადებას ბადრი პატარკაციშვილის ოჯახი ავრცელებს.

"ტრანზაქცია დასრულდა 2021 წლის აგვისტოში, რასაც წინ უძღოდა საქართველოს კომუნიკაციების ეროვნული მარეგულირებელი კომისიის მხრიდან თანხმობის მიღება. გარიგების პირობებით, მედიაჰოლდინგ იმედის მფლობელი კომპანია ჯორჯიან მედია ფროდაქშენ გრუფის (Georgian Media Production Group) 100%-ანი წილი გადაეცა მედია ფაინენს გრუპ ბი.ვი-ს (Media Finance Group B.V.), რომელიც შედის ჰანიველ პარტნერზის კომპანიათა ჯგუფში", — ნათქვამია განცხადებაში.

ჯორჯიან მედია ფროდაქშენ გრუპის წილის გასხვისებაზე თანხმობა ბადრი პატარკაციშვილის ქვრივმა, ინა გუდავაძემ, კომუნიკაციების კომისისგან იანვარში გამართულ სხდომაზე მიიღო. მაშინვე ითქვა, რომ მედიაჰოლდინგს ნიდერლანდებში რეგისტრირებულ კომპანია Media Finance Group ყიდულობს, რომლის მფლობელებიც არიან აშშ-ის მოქალაქეები — იგორ ალექსეევი, ირაკლი (ოთარ) რუხაძე და ბენჟამენ ალბერტ მარლსონი.

მაშინ რუხაძე აცხადებდა, რომ მან ტელეიმედი პარტნიორებთან ერთად 2 წლის წინ შეიძინა, ახლა მხოლოდ ფორმალური გადაფორმების თანხმობა მიიღო.

მფლობელის შეცვლა უკვე ასახულია საჯარო რეესტრში. ამასთან, Media Finance Group 25%-იან წილს ფლობს ტელეკომპანია მაესტროში და 100%-იან წილს რადიო იმედში.

ბიზნესმნენ ბადრი პატარკაციშვილის მიერ 2001 წელს დაარსებული იმედი მისი გარდაცვალების შემდეგ, 2008 წლიდან მისი ნათესავის, ჯოზეფ ქეის, მფლობელობაში გადავიდა, რასაც მაშინდელი მმართველი პარტიის მიერ არხის სრულად გაკონტროლება მოჰყვა. გარდაცვლილი პატარკაციშვილის ქვრივი, ინა გუდავაძე, წლების განავლობაში დაობდა კომპანიის დასაბრუნებლად. თუმცა, მას მხოლოდ ქართული ოცნების 2012 წელს ხელისუფლებაში მოსვლის შემდეგ გადაეცა, მაგრამ არა სასამართლოს გზით, არამედ ჯოზეფ ქეისთან შეთანხმებით. ამის შემდეგ კი არხი უკვე ქართული ოცნების ღია მხარდამჭერად ითვლება.