ქალთა ჯანმრთელობაზე ზრუნვის პროცესში მრავალი წინაღობა იქმნება. გარდა ჯანდაცვის ხელმისაწვდომობისა, პრობლემა სტიგმაში და გავრცელებულ მითებშია, მათ ნაწილს, კერძოდ გენიტალური სოკოვანი ინფექციის შესახებ, ერთად დავამსხვრევთ:

მითი #1: გენიტალური სოკოვანი ინფექცია მხოლოდ ქალებს აწუხებთ

რეალობა: კანდიდა, ანუ სოკოს სახეობა, რომელიც ყველაზე ხშირად იწვევს ინფექციურ დაავადებას, ნებისმიერი ადამიანის ორგანიზმშია (ქალი, კაცი, ბავშვი). გამოვლენისთვის კი ხელსაყრელ პირობებია საჭირო: მაღალი ტენიანობა, სველი და მოტკეცილი საცვლების ან საცურაო კოსტუმის დიდხანს ტარება, დაქვეითებული იმუნიტეტი და სხვა.

მითი #2: დაავადება გადადის წყლით (ზღვაში, აუზში)

თუ ყოველ ზაფხულს გტანჯავთ ერთი და იგივე შეკითხვა და ზუსტი პასუხი არ გაქვთ, გეტყვით: მიუხედავად იმისა, რომ ნესტიანი, სველი, დახუთული გარემოპირობები ხელშემწყობია სოკოს გამრავლებისთვის, რეალურად მისი გადადება/გავრცელება აუზში ან ზღვაში არ ხდება.

მითი #3: სოკოვანი ინფექცია აუცილებლად გამოხატულია ქავილით

მამაკაცებსა და ქალებში ინფექციას სხვადასხვა გამოვლენა აქვს. ქალების შემთხვევაში ხაჭოსებრი, თეთრი გამონადენი აუცილებელი პირობაა, ასევე შესაძლოა იყოს დისკომფორტი, სასქესო ბაგეების ქავილით გამოხატული. მამაკაცების შემთხვევაში კი - სასქესო ორგანოს შეწითლება, გამონაყარი და ტკივილიც კი შეიძლება იყოს აღნიშნული დაავადების ნიშანი.

მითი #4: ყველაფერი დამოკიდებულია ჰიგიენაზე

მიუხედავად იმისა, რომ რეკომენდაციების რიცხვშია: სველი საცურაო კოსტუმის, თეთრეულის დროული გამოცვლა, ფიზიკური დატვირთვის შემდგომ გადავლება, ჰიგიენური საფენისა და ტამპონის ხშირი ცვლა, ბამბის და ნატურალური ქსოვილის საცვლების ტარება, სამწუხაროდ ყველაფერი ჰიგიენაზე დამოკიდებული არ არის. მეტიც, ხშირად ზედმეტი მონდომებით კიდევ უფრო ვარღვევთ ბუნებრივ მიკროფლორას, მაგალითად სურნელოვანი სპრეებით, პუდრის ტიპის საშუალებებითა და ძლიერი საპნებით, რაც ზრდის ინფექციების რისკს.

მითი #5: იოგურტი პრობლემას აგვარებს

უცნაურად ჟღერს? გავრცელებულია მითი, რომ ქალებს, რომელთაც კანდიდოზი პერიოდულად აწუხებთ, კვების რეჟიმის ცვლილება სჭირდებათ. დიახ, შესაძლოა დიაბეტის მქონე პაციენტებს, ან მათ, ვინც ნახშირწყლებს დიდი რაოდენობით მოიხმარენ, მართლაც ჰქონდეთ გარკვეული შემსუბუქება რაციონში შაქრის შემცირებით, თუმცა იოგურტისა და პრეობიოტიკებით მდიდარი სხვა პროდუქტების აქტიური მიღება პრობლემას არ აგვარებს.

მითი #6: ვაგინალური სოკოსგან გათავისუფლება შესაძლებელია თვითმკურნალობით

არსებობს ვირუსების ძალიან ბევრი ტიპი, რომელთაც ერთნაირი სიმპტომატიკა ახასიათებს; მათი ნაწილი სქესობრივი გზით გადადის, ნაწილი კი სერიოზულ პათოლოგიაზე მიუთითებს. სწორედ ამიტომ, პირველ რიგში, აუცილებელია იმის გარკვევა საქმე გვაქვს რეალურად კანდიდოზთან თუ სხვა ინფექციურ დაავადებასთან.

ძალიან პოპულარული სამედიცინო ჟურნალის, Everyday Health-ის მონაცემებით, იმ ქალების ორი-მესამედი, ვინც სოკოს საკუთარი ძალებით ებრძვის და თვითმკურნალობას ინიშნავს, სულ არ არის აღნიშნული ვირუსით ინფიცირებული.

მიუხედავად იმისა, რომ თვითმკურნალობის გზები საქართველოსა და ევროპაშიც კი, ცნობილია (ძმრით გამორეცხვა, ნიორი, ბორის მჟავის სანთლები) ყოვლად დაუშვებელია მათი გამოყენება, რადგან ასე პაციენტი იზიანებს საშოს მიკროფლორას და შესაძლოა უარესი პრობლემების წინაშე დადგეს.

ზუსტი დიაგნოზი წარმატებული მკურნალობის აუცილებელი წინაპირობაა, ამისთვის გინეკოლოგი რამდენიმე ანალიზს დაგინიშნავთ და შესაძლოა აუცილებელი იყოს ნაცხის აღებაც. მხოლოდ ამის შემდგომ დაინიშნება შესაბამისი მკურნალობა: ადგილობრივი გამოყენების კრემი, სანთელი თუ სხვა საშუალება.

მითი #7: ვაგინალური სოკო რთული დაავადებაა

საბედნიეროდ, კანდიდოზის მკურნალობა ხელმისაწვდომი და საკმაოდ მარტივია. შესაბამისად, იშვიათია მისგან გამოწვეული გართულებები.

დაჯავშნეთ ვიზიტი სამედიცინო ცენტრ ციტოს უროლოგის ან გინეკოლოგის კაბინეტში, მიიღეთ კვალიფიციური სამედიცინო სერვისი ერთ სივრცეში და აქციეთ ჯანმრთელობაზე ზრუნვა ჩვევად!