საქართველოს ახალგაზრდა იურისტთა ასოციაციის თავმჯდომარე, ნიკა სიმონიშვილი ამბობს, რომ კულტურის მინისტრის მხრიდან მთავარი არხის ჟურნალისტისთვის ჟურნალისტური საქმიანობაში ხელის შეშლის ფაქტი შესაძლებელია შეიცავდეს სისხლის სამართლის კოდექსის 154-ე მუხლით გათვალისწინებულ დანაშაულის ნიშნებს. აღნიშნულზე სიმონიშვილი On.ge-სთან საუბრობს.

"ამ შემთხვევაში წაერთვა ჟურნალისტს იმის შესაძლებლობა, რომ მან ინფორმაცია მიაწოდოს, ანუ მას ხელი ეშლება საზოგადოებისთვის ინფორმაციის მიწოდებაში, აქედან გამომდინარე, ეს მნიშვნელოვნად ბადებს კითხვებს იმასთან დაკავშირებით, რომ შესაძლებელია ის შეიცავდეს სისხლის სამართლის კოდექსის 154-ე მუხლით გათვალისწინებული დანაშაულის ნიშნებს და აქვე არის მეორე საკითხი საინტერესო, რომ ჟურნალისტს მიკროფონი წაართვა და არ უბრუნებს, არც აპირებს, რომ დაუბრუნოს. თუ რა თქმა უნდა, ასეთი ღია და აშკარა წართმევა მოხდა მისაკუთრების მიზნით, ის არ აპირებს, რომ დააბრუნოს, აქ შესაძლებელია კიდევ სხვა დანაშაულის ნიშნებზეც ვილაპარაკოთ. სისხლის სამართლის კოდექსის სხვა მუხლებით არის გათვალისწინებული და ქონების დასაკუთრების წინააღმდეგ მიმართულ დანაშაულებშიც შესაძლებელია გადავიდეს, თუ ის არ აპირებს, რომ დააბრუნოს ეს მიკროფონი. რა თქმა უნდა, ამ კუთხითაც შესაძლებელია, რომ გამოძიება წარიმართოს, მაგრამ თუ ეს დროებით წაართვა იმის გამო, რომ მას თავისი მოვალეობა არ შეესრულებინა, რა თქმა უნდა, აქ ჟურნალისტურ საქმიანობაში ხელის შეშლის ნორმა მაინც რჩება", — აცხადებს სიმონიშვილი.

მისივე თქმით, ინფორმაციის მიღებისთანავე საგამოძიებო ორგანოები ვალდებული არიან, რომ დაიწყონ გამოძიება და ამის საფუძველი შესაძლოა გახდეს მიმართვაც და საჯაროდ გაკეთებული განცხადებაც.

ვიცე-პრემიერმა და კულტურის მინისტრმა, თეა წულუკიანმა, მთავარი არხის ჟურნალისტს მიკროფონი წაართვა და ამბობს, რომ არ დააბრუნებს. მთავარი არხის მიერ გავრცელებულ ვიდეოში ჩანს, როგორ ართმევს წულუკიანი ჟურნალისტს მიკროფონს, რომელიც კითხვას სვამს. ამის შემდეგ მინისტრი ამ მიკროფონით იწყებს საუბარს და ბიძინა ივანიშვილს მადლობას უხდის.