ევროპარლამენტის 17 წევრი საქართველოს პრემიერმინისტრს, გიორგი კვირიკაშვილის რუსთავი 2-ის საქმეზე წერილით მიმართავენ.

ევროპარლამენტარები შეშფოთებას გამოხატავენ და აღნიშნავენ, რომ დამოუკიდებელ ტელეარხ რუსთავი 2-ზე ზეწოლა მიმდინარეობს.

"რუსთავი 2 მისი მფლობელის იძულებითი ცვლილების სამიზნე გახდა. მიმდინარე ზეწოლამ პიკს მიაღწია 2 მარტს, როდესაც უზენაესმა სასამართლომ არხი მის ყოფილ მფლობელს და ხელისუფლებასთან დაახლოებულ პირს, ქიბარ ხალვაშს, მიაკუთვნა.

არხის მფლობელისა და მისი სარედაქციო პოლიტიკის შეცვლა რუსთავი 2-ს ხელისუფლებისადმი მეგობრულად განწყობილ მედიად გადააქცევს, რაც სერიოზულ დაბრკოლებას შეუქმნის ქვეყანაში თავისუფალ მედიას და შეამცირებს დემოკრატიის ხარისხს" - წერენ ევროპარლამენტარები.

ისინი მიიჩნევენ, რომ რუსთავი 2-ის საქმესთან დაკავშირებით მიღებული გადაწყვეტილებები საქართველო ევროკავშირის შორის დადებული ასოცირების შეთანხმების პირობების შეთანხმებას ხელს უშლის.

ევროპის პარლამენტი მოუწოდებს საქართველოს ხელისუფლებას, ნუ გამოიყენებს სასამართლო სისტემას პოლიტიკურად მომგებიანი შედეგის მისაღებად.

ევროპარლამენტარები ასევე მოუწოდებენ ევროპის კომისიასა და ევროკავშირის საგარეო ქმედებათა სამსახურს (EEAS), კრიტიკული შეაფასონ საქართველოს ხელისუფლების ქმედებები და ევროკავშირთან საქართველოს მიერ დადებული შეთანხმების შესრულება მოითხოვონ.

ევროპის პარლამენტის წარმომადგენლები აცხადებენ, რომ ისინი განაგრძობენ საქართველოს მხარდაჭერას თანამედროვე, დემოკრატიული სახელმწიფოს მშენებლობის გზაზე, რისთვისაც კანონის უზენაესობისა და ადამიანის უფლებების დაცვის პრინციპებს ეფუძნება.