პარლამენტმა ცესკოს თავმჯდომარე და წევრები ვერ აირჩია. ცესკოს თავმჯდომარის და წევრობის ორ ვაკანტურ თანამდებობაზე ორ-ორი კანდიდატი იყო წარდგენილი. თუმცა, ვერც ერთ მათგანზე შეთანხმება ვერ მოხდა. საარჩევნო კოდექსის ახალი ცვლილებით კი, თითოეული მათგანის დასამტკიცებლად ხმების 2/3 არის საჭირო, რასაც მმართველი გუნდი ოპოზიციის გარეშე ვერ აგროვებს.

ცესკოს თავმჯდომარედ წარდგენილი იყო ორი კანდიდატურა — გიორგი კალანდარიშვილი და გიორგი სანტურიანი. ორივე ცესკოს მოქმედი თანამშრომელია და მაღალ პოზიციებს იკავებენ, რამაც მათ მიმართ უნდობლობის საკითხი თავიდანვე გააჩინა. შესაბამისად, არასამთავრობო სექტორის დიდი ნაწილის და ოპოზიციის მხარდაჭერა არ ჰქონდათ. პრეზიდენტმა ორივე მათგანი პარლამენტს ცესკოს თავმჯდომარეობის კანდიდატად წარუდგინა. იურიდიულ კომიტეტზე კანდიდატების განხილვისას გამოჩნდა, რომ მმართველი პარტია მხარს გიორგი კალანდარიშვილს უჭერდა. თუმცა, ეს მხარდაჭერა დასამტკიცებლად საკმარისი არ აღმოჩნდა, რადგან მმართველი გუნდი საჭირო 100 ხმას ვერ აგროვებს. შედეგად, სესიაზე კალანდარიშვილს მხარი 82-მა დეპუტატმა დაუჭირა, სანტურიანს კი — 2-მა.

ამასთან, პარლამენტმა ვერც ცესკოს წევრობის ვაკანტურ თანამდებობაზე ვერ მოახერხა წარდგენილი კანდიდატებიდან ვერც ერთის დანიშვნა, რადგან საჭირო 100 ხმა ვერც ამ შემთხვევაში მოგროვდა. ამჯერად პარლამენტს ცესკოს წევრობის 2 ვაკანტურ თანამდებობაზე არჩევანი უნდა გაეკეთებინა გია ცაცაშვილი-ლელა ტალიურის და მაია ზარიძე-თამარ სართანიას წყვილებიდან თითოზე. მიუხედავად იმისა, რომ მმართველი გუნდი მხარს ცაცაშვილს და ზარიძეს უჭერდა, საკმარისი ხმები მაინც ვერ მიიღეს — ცაცაშვილს მხარი 82-მა დაუჭირა, ზარიძეს — 81-მა. შესაბამისად, ცესკოს წევრობის ორივე ვაკანტური თანამდებობა პროფესიული ნიშნით ისევ ცარიელია.

საარჩევნო კანონმდებლობაში განხორციელებული ცვლილებებით, ცესკოს თავმჯდომარისა და წევრების არჩევას 100 ხმა სჭირდება. იმ შემთხვევაში, თუ 2/3 -ით არჩევა ვერ მოხერხდა, კენჭისყრა კვლავ 2/3-იანი კვორუმით უნდა ჩატარდეს და არჩევა თუ მაინც ვერ მოხერხდა, ამ შემთხვევაში, საჭირო იქნება 3/5 ანუ 90 ხმა. პარლამენტმა ცესკოს თავმჯდომარე და წევრები თუ ამ კვორუმითაც ვერ აირჩია, მაშინ არჩევისათვის 76 ხმა საკმარისი იქნება. ახალი კანონის მიხედვით, თუ ცესკოს თავმჯდომარე არჩეულია პარლამენტის სრული შემადგენლობის არანაკლებ ორი მესამედის უმრავლესობით, მისი უფლებამოსილების ვადაა 5 წელი, ხოლო სხვა შემთხვევაში − 6 თვე.

ცენტრალური საარჩევნო კომისიის თავმჯდომარე, თამარ ჟვანია 30 ივნისს გადადგა.

2020 წლის ოქტომბრის არჩევნების შემდეგ ოპოზიცია თამარ ჟვანიას არჩევნების გაყალბების ხელშეწყობაში ადანაშაულებდა და მის გადადგომას მოითხოვდა. ჟვანიას გადადგომის მოთხოვნა ჟღერდებოდა ელჩების ფასილიტაციით გამართული შეხვედრების პერიოდშიც. ჟვანიას გადადგომის მოთხოვნებს არ იზიარებდნენ ქართულ ოცნებაში.

საარჩვენო კანონმდებლობის რეფორმა შარლ მიშელის დოკუმენტის ერთ-ერთი მთავარი საკითხია. 28 ივნისს პარლამენტმა დაამტკიცა ცვლილებები საარჩვენო კოდექსში, რომელიც ცესკოს თავმჯდომარის ახალ წესს ითვალისწინებს.

გაიგე მეტი: