კონსერვატიული "გერმანიის ქრისტიან-დემოკრატიული კავშირისა" და "ბავარიის ქრისტიან-სოციალური კავშირის" (CDU/CSU) ბლოკი და გერმანიის "სოციალ-დემოკრატიული პარტიის" წარმომადგენლებმა კოალიციური შეთანხმების შესახებ განაცხადეს, — ამის შესახებ Der Spiegel იტყობინება.

ბერლინში გამართულ პრესკონფერენციაზე, რომელზეც პარტიებმა ახალი კოალიციური შეთანხმება გამოაცხადეს, ესწრებოდნენ: ქრისტიან-დემოკრატიული კავშირის ლიდერი ფრიდრიხ მერცი, რომელიც მომავალ სამთავრობო კოალიციას უხელმძღვანელებს, ბავარიის პრემიერ-მინისტრი და ქრისტიან-დემოკრატიული კავშირის ლიდერი მარკუს ზოდერი, ასევე სოციალ-დემოკრატიული პარტიის თანათავმჯდომარეები სასკია ესკენი და ლარს კლინგბეილი.

მხარეებმა მოამზადეს შეთანხმება სახელწოდებით "პასუხისმგებლობა გერმანიისთვის" (Verantwortung für Deutschland). დოკუმენტი სათაურის გვერდის ჩათვლით 146 გვერდისგან შედგება. როგორც Der Spiegel აღნიშნავს, თავდაპირველად მხარეებს მხოლოდ ეკონომიურად მომგებიან კოალიციურ შეთანხმებაზე შეთანხმება სურდათ და არა ყველა დეტალის რეგულირება.

"წინ რთული სამუშაო გველის", — თქვა მერცმა შეთანხმების წარდგენისას. მისი თქმით, კოალიცია "ქვეყანას წინ წაიყვანს". მან ასევე აღნიშნა, რომ კოალიციის ფორმირებამ გერმანიის მოქალაქეებსა და ევროკავშირში პარტნიორებს მკაფიო სიგნალი უნდა გაუგზავნოს, რომ გერმანიას ჰყავს "მთავრობა, რომელიც ქმედითია და მოქმედების უნარიანი".

Der Spiegel-ის ცნობით, სოციალ-დემოკრატიული პარტია კოალიციური შეთანხმების საკითხზე კენჭისყრას 15 აპრილის დილით დაიწყებს და 29 აპრილის საღამომდე გაგრძელდება. მას შემდეგ, რაც სოციალ-დემოკრატიული პარტიის წევრები შეთანხმებას დაამტკიცებენ, დაიწყება კანცლერის არჩევისა და მთავრობის ფორმირების პროცესი.

კონსერვატიულმა CDU/CSU ბლოკმა თებერვალში გამართულ ბუნდესტაგის ვადამდელ არჩევნებში პირველი ადგილი დაიკავა. მეორე ადგილზე ულტრამემარჯვენე პარტია "ალტერნატივა გერმანიისთვის" გავიდა, ხოლო მესამეზე — "სოციალ-დემოკრატიული პარტია".