"მიმართულება აღებულია — პერსონალიზებული სანქციები ივანიშვილისა და მისი გარემოცვის მიმართ - და ამ მიმართულებით ვმუშაობთ", — ამის შესახებ "რადიო თავისუფლებასთან" საუბრისას ბრიტანელი პარლამენტარი, ლიბერალ-დემოკრატთა პარტიის წარმომადგენელი ჯეიმს მაკკლირი ამბობს.

მისი თქმით, "ლონდონი და საერთოდ, დიდი ბრიტანეთი ივანიშვილისთვის იქცა არა მხოლოდ ქონების შესანახ ადგილად, ის თავის პროპაგანდასაც ბრიტანეთიდან ინახავს".

"თუ ბრიტანეთს გულისხმობთ, გარკვეული ნაბიჯები უკვე გადადგმულია, სანქციებიც დაწესდა. ვიცით, რომ ლონდონი და საერთოდ, დიდი ბრიტანეთი ივანიშვილისთვის იქცა არა მხოლოდ ქონების შესანახ ადგილად, ის თავის პროპაგანდასაც ბრიტანეთიდან ინახავს. ეს საგანგაშოა და ჩვენ, როგორც დემოკრატიული ქვეყანა, ამაზე თვალის დახუჭვას არ ვაპირებთ. მიმართულება აღებულია - პერსონალიზებული სანქციები ივანიშვილისა და მისი გარემოცვის მიმართ — და ამ მიმართულებით ვმუშაობთ. იმედი გვაქვს, რომ [ბრიტანეთის] მთავრობაც ამ გზას დაადგება", — აცხადებს ჯეიმს მაკკლირი.

ჯეიმს მაკკლირის თქმით, "ლეიბორისტების უმეტესობა ეთანხმება იმ აზრს, რომ ერთ პირს არ უნდა ჰქონდეს ისეთი გავლენა ქვეყნის მართვაზე, როგორიც ივანიშვილს აქვს. და რომ დიდ ბრიტანეთს, როგორც ქვეყანას, აქვს ბერკეტი – სანქციების მეშვეობით – აჩვენოს, რომ არ ვეთანხმებით ამ ქმედებებს".

"ცხადია, თითოეული პარლამენტარის პოზიცია არ ვიცი, მაგრამ ჯერ-ჯერობით არ მსმენია პარლამენტში ვინმე ამის წინააღმდეგ ღიად გამოსულიყო. ფაქტია, რომ ზეწოლა არსებობს, თანაც არა ერთპარტიული, ივანიშვილსა და მის გარემოცვაზე სანქციების დაწესების მოთხოვნით. მთავრობა ამ ყველაფერს ისმენს და იმედი მაქვს, კულუარებში ნაბიჯებიც იდგმება აქამდე მისასვლელად. ვფიქრობ, სანქციებს პაკეტის ფორმა უნდა მიეცეს — თუ გვინდა მკაფიო გზავნილის გაგზავნა იმასთან დაკავშირებით, რომ დემოკრატიული პროცესების დევალვაცია მიუღებელია, მით უმეტეს, როცა ამისთვის ბრიტანეთში არსებული აქტივებია გამოყენებული, მაშინ ეს აქტივები უნდა გაიყინოს. და ეს მხოლოდ ივანიშვილს არ გულისხმობს — ეს ეხება მის გარემოცვასაც, მათ შორის იმათ, ვინც პროპაგანდისტულ მედიას ქმნის — ყველა ერთად უნდა მოხვდეს სანქციების ამ პაკეტში", — ამბობს ბრიტანელი პარლამენტარი.

ჯეიმს მაკკლირის ფიქრობს, რომ ივანიშვილი "შიშობს, რომ შეიძლება გაიღვიძოს და აღმოაჩინოს, რომ გაერთიანებულმა სამეფომ მას და მის აქტივებს სანქციები დააკისრა".

"გულწრფელად რომ გითხრათ, ვფიქრობ, ივანიშვილს უკვე გავუტეხეთ ძილი, უკვე შიშობს, რომ შეიძლება გაიღვიძოს და აღმოაჩინოს, რომ გაერთიანებულმა სამეფომ მას და მის აქტივებს სანქციები დააკისრა", — ამბობს ჯეიმს მაკკლირი "რადიო თავისუფლებასთან" ინტერვიუში.